Nasoins Unidas: Timor-Leste iha Mudansa ba Dezenvolvimentu

DILI, www.news-viptv.com – Timor-Leste hafoin nia independensia no tama ona ba tinan 25 iha mudansa bo’ot ba desenvolvimentu.

David Mclachan-Karr nu’udar Reprezenta Gabinete Koordenasaun Dezenvolvimentu Nasoins Unidas hateten nia kontente tebes bele fila fali iha Timor-Leste desde tinan 1999, ne’ebe hosi nia observasaun hare’e dezenvolvimentu barak liután iha Kapital Dili.

Iha nia hasoru malu ho PM Xanana Gusmao, nia koalia kona ba kooperasaun ne’ebe Nasoins Unidas sei halo ho Governu Timor-Leste liliu ba programa Objetivu Dezenvolvimentu Sustentabilidade (ODS).

“Ohin loron iha onra boot tebes hodi hasoru malu ho nia Exelensia, Primeiru-Ministru Timor-Leste, hodi diskute área kooperasaun entre Governu Timor-Leste no Nasoins Unidas. Ha’u reprezenta Gabinete Koordenasaun Dezenvolvimentu Nasoins Unidas nian, no ami sei servisu hamutuk ho governu hodi halo formulasaun ba ami-nia enkuadramentu kooperasaun foun durante tinan lima entre Governu Timor-Leste no sistema Nasoins Unidas nian iha Timor-Leste. Ami ko’alia kona-ba prioridade sira governu nasionál nian ba dezenvolvimentu, prioridade sira iha saúde no edukasaun iha governasaun no turizmu iha enerjia, agrikultura, prioridade barak husi governu foun no oinsá mak ita sei servisu hamutuk ho ita-nia kuadru kooperasaun foun,” dehan David Mclachlan ba jornalista sira iha Palacio Governo, Dili, Sexta (26/04/2024).

Iha kooperasaun ne’e Nasoins Unidas sei fokus liu ba saúde no edukasaun nu’udar baze ba desenvolvimentu nasaun nian.

“Ne’e mak servisu báziku ne’ebé governu tenke fornese ba povu atu dezenvolve. Tanba ne’e, ita sei foka ita-nia esforsu ba setór sosiál, maibé atu alkansa objetivu dezenvolvimentu sustentavel sira, ita mós presiza servisu iha kestaun sira hanesan ne’e kriasaun empregu, protesaun sosiál, maibé mós tranzisaun ba ekonomia dijitál liu,” nia dehan.

Maski fokus liu ba area saude no edukasaun, maibe Nasoins Unidas mos hakarak konekta foinsa’e Timoroan sira ba mundu no ekonomia. No mos iha area turizmu hodi oinsa liga Timor-Leste ho ekonomia verdes ho azul.