Mota Bo’ot iha Viqueque Hamate Labarik 1 Mate, Uma 27 iha Baucau Anin Sobu

DILI, www.news-viptv.com – Udan bo’ot no anin bo’ot ne’ebe akontese iha Nunuwai, Suku Batata, Postu Watu Karbau, Munisipiu Viqueque hamate labarik ida ho idade tinan 7 tamba mota lori.

Autoridade Protesaun Sivil (APC) iha nia konferensia imprensa, Segunda (23/9/2024), informa labarik ho naran Nelvia da Cruz ne’e mota lori hamutuk ho labaruk nain 2 seluk ne’ebe hetan deit kanek.

“Momentu ne’eba telefone husi administrator postu Watukarbau katak iha suku Batata aldeia Nunuwai iha loron 18 Setembru akontese mota lori labarik nain 3, labarik nain rua kanek no nain ida lakonsege salva nia vida, vitima nia naran Nelvia da Cruz ho idade tinan 7 nia isin mate hetan fali ona iha 21 Setembru,” dehan Porta-Voz APC, Cesario Marques.

Alende ne’e, nia mos esplika hahu husi loron 16 to’o 23 Setembro 2024, CNOP-APC rejista mos uma 27 iha Munisipiu Baucau hetan estragus tamba anin bo’ot ne’ebe sobu sira nia uma.

“Autoridade Protesaun Sivil rejistu kazu numeru estragus hamutuk 32, anin sobu uma 31, insendiu urbana 1, mate 1, no kanek 2. Munisipiu sira ne’ebe mak afeta ba tipu anin sobu ne’e mak hanesan, Atauru anin sobu uma 1, Baucau anin sobu uma 27, Covalima anin sobu 1 no iha munisipiu Dili anin sobu rua no insendiu urbanu 1, ho nia numeru ema ne’ebe afetadu hamutuk 181,” nia hateten.