Membru Naval 106 Tuir Treinamentu Fuzileiru Navais

HERA, www.news-viptv.com – Atu sai forsas espesial komponente Naval nain, membru Naval hamutuk 106, inklui militar feto ida partisipa treinamentu Fuzileiru Navais.

Iha nia deskursu abertura, reprezentante Xefe Estadu Maior FALINTIL-FDTL Kapitaun Mar e Guerra Higino das Neves atuál komandante Komponente Naval, hateten sente orgullu tamba treinamentu dadauk ne’e formador mai rasik hosi forsas Timoroan.

“Primeira vez uza instrutór Timoroan ba hahu kintu kursu formasaun Fuzileirus Navais ne’e, ha’u orgullu tebes ba Timor oan katak Ita mós komesa prepara aan ona atu sai formador diak ba Militár sira iha futuru oin mai,” dehan Kapitaun Mar e Guerra Higino das Neves iha komunikadu imprensa ne’ebe publika Kuarta (4/5/2022).

Parte seluk, Kapitaun Higino das neves mos orgullu ho prezensa feto militar ida iha treinamentu ne’e hodi konkore mos ba forsa espesial naval nian.

“Ha’u orgullu tanba feto Militár ida hakarak konkore ba forsa espesial ne’e laós fasil tanba atu treina forsa ida ne’e la hanesan forsa baibain, treinu ne’ebé durante ne’e sakrifisiu bo’ot maibé konforme lema sentru instrusaun,” nia dehan.

Kapitaun ne’e mos espera liu hosi treinamentu durante fulan 4 ne’e, militar sira ne’ebe partisipa iha treinamentu ne’e bele sai duni forsa espesial iha naval nian hodi bele hamrik nudar forsas armadas espesial ba Timor-Leste.