Meci, Tradisaun Han Lumbriga Tasi hosi Lautem

COM, www.news-viptv.com – Labarik feto foinsa’e sira ne’e tama ba tasi laran hodi kanta laos tamba kontenti bele haris tasi hamutuk, kuarta kalan, nudar loron espesial ba komunidade sira hosi Munisipiu Lautem hodi halibur hamutuk rihun ba rihun iha area tasi ibun Com ho objektivu kaer Meci.

Festival Meci karik maluk sira hatene festival ne’e, sim festival ne’e so akontese iha Munisipiu Lautem, liliu iha area tasi ibun Com, Tutuala no Lore ne’ebe akontese deit kada tinan ida dala ida, iha fulan Marsu no akontese iha rai kalan deit.

Meci ou iha lian biolojia internasional konesidu ho naran Palopo Worm hanesan parasite lumbriga ida iha tasi laran ne’ebe dezemvolve an iha fatuk coral no sempre mosu iha area tasi ibun costa sul sira. Laos deit iha Lautem, Meci mos mosu iha Indonesia, area Lombok (Nusa Tenggara Barat) nebe bolu bau nyale inklui iha ilha Pasifiku sul sira.

Nudar kalan ne’ebe labele husik hosi komunidade Lautem sira, hanesan Marijina dos Santos ho nia laen, hosi Iralafai, Bauro, maski hela dook hosi tasi ibun partisipa mos iha festival refere hodi bele kaer mos meci ne’ebe mosu rihun ba rihun iha tasi ibun Com, Postu Administrativu Lautem.

Maun Rui nudar komunidade ida mos lakohi soe tempu ho oportunidade dala ida kada tinan ida, nia hahu prepara ona desde tuku 5 lokoraik iha tasi ibun com hodi hamutuk kaer meci ho komunidade sira.

Governu liu hosi Ministeriu Turismu hatama ona tradisaun kaer Meci iha kalendariu festival nian ne’ebe hanaran Festival Meci ne’ebe tinan ida ne’e governu konsentra nia atividade iha Tasi Lore, Postu Administrativu Lospalos.

Reportagem: Mateus da Costa