MCI Realiza Feira Produtu Lokal Iha Selebrasaun Loron Nasional Liberdade Imprensa

BALIBO, www.news-viptv.com – Ministru Komérsiu no Indústria, Nino Pereira halo abertura feira durante semanal iha ambitu komemorasaun tinan 50 trajédia Balibo Five no selebrasaun loron Nasionál Liberdade Imprensa, Segunda (13/10/2025), iha Postu Administrativu Balibo, Munisípiu Bobonaru.

Ministru Nino Pereira hateten, iha fulan Outubru 2025, Timoroan hotu senti orgullu tanba konsege ultra passa prosesu boot ida ne’ebé sei marka mós momentu istóriku importante ba Timor-Leste.

Iha tempu ne’e, nia esplika, Timor-Leste sei ofisiálmente sai nasaun membru ba iha Asosiasaun Nasaun Sudeste Aziátiku (ASEAN), ne’ebé marka etapa foun iha jornada dezenvolvimentu no kooperasaun rejionál Timor-Leste nian.

“Ida ne’e mós reflete ita hotu nia partisipasaun, la’ós de’it iha área ekonómika, maibé mós iha asesu ba informasaun. Iha kontestu ne’e, ita sei realiza abertura feira produtu lokal hanesan parte husi komemorasaun loron Aihan Mundial Internasionál, hodi promove produtu nasionál no aumenta konsientizasaun komunidade kona-ba importánsia produtu lokal nian,” hatete Nino Pereira.

Nia esklarese, alénde de promove ekonómia hahán lokal, Timoroan hotu presiza hamutuk atu fortifika kometmentu no portidaun iha kualker área profisionál ne’ebé hakarak dezenvolve.

“Istória sai hanesan lalenok ida atu ita nafatin hateke no leno aan, ita mai husi ne’ebé, ita iha ne’ebé no atu ba iha ne’ebé. Ita hanesan Timor oan, presiza kontinua ho orgullu iha rai doben Timor-Leste, ho vizaun atu moris iha liberdade tomak,” nia dehan hodi hatutan, “Liberdade ida ne’e la’ós de’it iha polítika, maibé mós iha ekonómia no aihan, hodi ita bele sai Nasaun soberanu iha aspetu hotu-hotu”.

Reprezentante Prezidenti Munisipiu Bobonaru, Julio Caero lori governu local hato’o agradese ba Ministru Nino Pereira ne’ebe realiza feira hodi promove aihan local, espesialmente husi komunidade Munisipiu Bobonaro.

“Ohin loron ita hamutuk iha ne’e, ha’u reprezenta Prezidenti Autoridade, hato’o agradesimentu bo’ot teb-tebes ba programa Nunu Governu,  liu husi sua-selensia Ministru komersiu Industria ne’ebe mak ohin loron mai loke feira ida ne’e,  hodi promove aihan lokal nian,” nia dehan.

Reperezentate Konselu Imprensa Isabel hateten, prezensa ema hotu nian iha feira hatudu kompromisu koletivu ba futuru alimentasaun ekonomia lokal no identidade kultura.

“Feira produtu lokal nu’udar espasu ida ne’ebe atu valoriza agrikultur siral nia servisu. Sira mak eroi verdadeiru ne’ebe ho esforsu no dedikasaun tomak prepara aihan sira, liu husi sira nia liman badinas. Feira ida-ne’e laos eventu uniku ida, maibe nu’udar eventu dahuluk ne’ebe sei lori ita hotu, hodi ba komemora, loron tolu ne’ebe mak importante  hanesan, loron mundial alimentasaun, loron ne’ebe importante qtu garante aihan sustentável, saudavel no justu ba ema hotu,” nia hateten.

Trazedia Balibo, iha tinan 1975, ne’ebe konesidu ho naran Balibo five, loron ne’ebe Jornalista Australianu nain 5, lakon sira nia vida, wainhira hala’o sira nia knar hodi haklaken lia los ba Timor-Leste nia nia luta ukun rasik an.