Maudoko vs VDL, Loke Jogu LTFF Segunda Divisaun Epoka 2021

DILI, news-viptv.com – Liga Timorense Futebol de Femenina (LTFF) epoka 2021 sei loke ho jogu hosi Segunda Divisaun entre FC. Maudoko versus FC. VDL.

Tuir orariu hosi Federasaun Futebol de Timor-Leste (FFTL), jogu entre FC. Maudoko vs FC. VDL sei halao Kinta lokoraik ne’e tuku 16.00 iha Estadiu Munisipial Dili.

“Ba primeira divisaun ne’e sei hahu jogu iha Sabadu entre Buivere kontra S’Amuser,” informa Gelasio da Silva, Direitor Kompetisaun LTFF ba VIPTV, iha nia servisu fatin FFTL House, Bairo Grillos, Dili.

Treinador FC. Maudoko, Salvador hateten, nia jogador pronto ona ba jogu ne’e no fiar katak sei hatudu jogu ne’ebe kapas.

“Ami hatene VDL iha jogador ne’ebe diak hosi selesaun juvenile sira, maibe ami mos sei hatudu joga diak iha jogu ne’e,” dehan Salvador, Tersa (17/8/2021), iha kampu FFTL.

Iha epoka 2021, FFTL fahe ona klubu 6 mak kompete iha segunda divisaun maka FC. Maudoko, FC. VDL, AF. Baucau, FC. São Jose, FC. Unital no FC. Nain-Feto.

Entertante iha Primeira Divisaun maka FC. Buibere, AD. SLB, FC. S’Amuser, FC. Maranatha no FC. Academica.