Loron Internasional Feto, PR Horta: Persiza Investe ba Empoderamentu Feto

DILI, www.news-viptv.com – Prezidenti Republika (PR), Jose Ramos Horta iha nia mensajem ba Loron Internasionál Feto nian iha tinan 2024, Timor-Leste reforsa ninia kompromisu maka’as atu investe iha empoderamentu feto no labarik-feto sira iha setór hot-hotu.

PR Horta informa katak, bainhira investe iha feto sira-nia edukasaun, kuidadu saúde, oportunidade ekonómiku no papél lideransa, bele aselera progresu ba sosiedade tomak.

“Feto ida-ne’ebé iha kbiit boot hasa’e dignidade nia família, nia komunidade no ita-nia nasaun. Investimentu iha feto sira mak, investimentu ba futuru ne’ebe naroman liu no prosperu liu ba Timor-Leste no mundu,” dehan PR Horta iha Komunikadu Imprensa ne’ebe mak VIP TV asesu iha Sesta (8/3/2024).

Xefi estadu iha nia mensajem ne’e mos husu ba kontinua halakon barreira sira, dezafiu ba estereotipu jéneru no kria mundu ida-ne’ebé hanesan, iha ne’ebé feto ida-idak bele atinji nia potensialidade tomak sein impedimentu.

“Ksolok Loron Internasionál Feto ba Feto hotu-hotu ne’ebé iha Timor-Leste no iha mundu tomak, ne’ebé nia reziliénsia, determinasaun, no kontribuisaun forma futuru ida-ne’ebé di’ak liu ba ema hotu,” dehan xefi estadu.