Loke Vaga 200, Komisariu Henrique: Tama Polisia Laos Atu Buka Servisu

Dili, www.news-viptv.com – Komandante Jerál Polísia Nasionál Timor-Leste (PNTL), Komisariu Henrique da Costa, sei rekruta membru Polísia foun 200 iha tinan ne’e no konsidera vaga tama Polisia labele hanoin atu buka servisu.

Ema numeru ida iha instituisaun seguransa ne’e hateten, membru polisia wainhira halao nia knar barak liu sei hasoru risku, tamba ne’e labele konsedera katak tama polisia atu buka buka servisu.

“Fiar katak prosesu ne’e, saida de’it ita hetan ema ne’ebé kualidade nune’e dedika duni ninia an ba servisu institutusaun PNTL. Polísia ka forsa ne’e lá’os atu buka servisu ne’e mak koloka ne’eba laiha, mais ema ne’e hakarak dedika duni ninia an. Bainhira ita halo servisu ne’e ita sei hasoru risku ne’e barak, ita prontu atu halo ida ne’e ka la’e,” hateten Komisariu Henrique ba Jornalista sira hafoin hasoru malu ho Prezidenti Republika, Jose Ramos-Horta, Tersa (16/1/2024), iha Palasiu Prezidensial, Dili.

Ba prosesu rekrutamentu, esplika Komisariu Henrique, PNTL finansialmente iha ona orsamentu tama koloka ona iha Orsamentu Jeral Estadu 2024.

Ante loke vaga ba publiku, PNTL sei iha komisaun ida hodi halo preparasaun ba rekrutamentu nian hodi hare kriteriu no regras sira ne’ebe sei implementa, antes hetan aprovasaun hosi Ministru Interior nu’udar superior maximu ba PNTL.

“Aprovasaun ida ne’e sei la’ós hala’o mesak, mais tuir orientasaun husi Ministru Interiór nian katak ita sei presiza mós parseiru sira husi parte jéneru nian hodi halo rekrutamentu ida ne’e, mas ida ne’e desizaun Ministru Interiór nian,” dehan Komisariu ho Fitun Rua ne’e.

Ho planu rekrutamentu ne’e, PNTL husu ba kandidatu sira ne’ebe hakarak aplika ba vaga refere atu prepara an, liliu fizikamente no ho kondisaun saude ne’ebe diak.

Antes ne’e, Komandu PNTL rezeita informasaun ne’ebe espalla iha media sosial kona-ba rekezitus rekrutamentu no konsidera hoax.

“Husi komandu rasik seidauk hasai rekezitus ida ne’e, tuir informasaun ne’ebe maka hato’o husi Komandante Jerál PNTL no Ministru Interior kona-ba rekrutamentu, sim. Maibé komisaun husi Komandu Pesoal no Formasaun rasik seidauk estabelese Komisaun Rekrutamentu no mós rekezitus sira ne’e, tanba servisu sira ne’e sei iha faze preparasaun, nune’e informasaun sira ne’ebe espalla iha Facebook, ne’e Lalos,” informa Porta Voz Komandu PNTL, Superintendente Polísia António da Luz liu husi konferensia imprensa, Tersa (16/1/2024), iha Kuartel Jeral PNTL, Kaikoli, Dili.

Superintendente Polísia ne’e mós salienta tan katak kona-ba rekrutamentu nian sei iha Komisaun Rekrutamentu ne’ebe maka sei estabelese no sei fó sai anunsiu klaru wainhira Komisaun ne’e hetan ona aprovasaun husi Komandante Jerál PNTL.

“Husu ba joven sira atu bele halo preparasaun fíziku, labele envolve iha hahalok krime sira no mós prepara imi nia saúde, karik iha oportunidade aban-bainrua wainhira loke duni rekrutamentu, oportunidade ba alin sira atu bele kompete, maibé agora dadaun seidauk tanba husu ba maluk sira atu labele espalla informasaun ne’ebe maka la klaru,” apela Porta-Voz PNTL ne’e.