Loes no PA 3 iha Kelikai Sei Sai PA Foun

Dili, www.news-viptv.com – Suku Loes ne´ebe durante ne´e tama iha teritoriu Postu Administrativu (PA) Maubara, Munisipiu Liquisa sei sai PA foun hamutuk ho PA Kelikai ne´ebe sei hamosu mos PA rua (2) seluk.

Dezisaun Governu hodi hamosu PA foun ne´e aprova liu hosi sorumutuk Konsellu Ministru iha Kuarta (15/3/2023).

“Aprova mós projetu Proposta Lei, ne’ebé aprezenta husi Ministru Administrasaun Estatál, Miguel Pereira de Carvalho, alterasaun datoluk ba Lei nu. 11/2009, loron 7 fulan-outubru, kona-ba Divizaun Administrativa Territóriu,” hakerek komunikadu imprensa ne´e publika hosi Presidensia Konsellu Ministru.

Projetu Proposta Lei  ne’e ho objetu kriasaun sirkunkriasaun administrasaun inframunisipál foun tolu ka eskalaun daruak, ne’ebé rezultadu hotu-hotu husi prosesu desizaun postu administrativu sira daudaun ne’e eziste.

Alterasaun dahuluk hala’o iha postu administrativu atuál Maubara, iha Munisípiu Likisa, ne’ebé inklui área besik 264 km²,  korresponde 48,7% husi territóriu munisípiu no populasaun besik ema rihun 22. Nune’e postu administrativu ne’e fahe ba rua: Maubara  ne’ebé hela ho área 132km² no  populasaun hamutuk 12.194; no Loes hela ho área 132 km²  no populasaun besik ema 9.700.

Alterasaun daruak hala’o iha postu administrativu atuál Kelikai, iha Munisípiu Baukau, ne’ebé inklui área besik 13,7% husi territóriu munisípiu no populasaun besik 17.471. nune’e, postu administrativu ne’e fahe ba tolu; Kelikai hela ho área 46 km² no abitante hamutuk 7.096; Kelikai Antiga hela ho área 80 km² no populasaun besik 5.998; no Matebian ho área 80km² ho abitante besik 4.300.

Konsidera katak prosesu eleisaun Parlamentu Nasionál ne’ebé la’o hela no atu permite ba Governu Atuál no Governu tuirmai planea no ezekuta medida nesesária sira ba estabelesimentu no tama ba funsionamentu administrasaun foun sira iha postu administrativu no órgaun respetivu sira, Proposta Lei ne’e sei tama iha vigór iha loron 1 fulan-janeiru tinan 2024.

Iha sorumutuk Konsellu Ministru ne´e, Ministru Administrasaun Estatál, Miguel Pereira de Carvalho, aprezenta mos opsaun rekoñesimentu ba suku foun sira.

Halo ona aprezentasaun ida kona-ba inisiativa alterasaun ba diploma miniteriál kona-ba rekoñesimentu ba suku no aldeia foun sira,  hodi rekoñese suku foun sanulu,  ne’ebé sei tama iha vigór iha loron 1 fulan outubru tinan 2023, ho objetivu atu fasilita komunidade sira hodi asesu ba sentru suku sira, aproxima autoridade lokál ba komunidade sira no promove dezenvolvimentu iha rejiaun sira ne’e.