banner 1000x250

Lansa Programa Sensus Populasaun, Governu Aloka US$ 3.1 Miliaun

  • Share
PR Ramos-Horta hamutuk ho PM Taur Matan Ruak hamutuk ho membru governu balun iha lansamentu programa Sensus Populasaun no Uma Kain Timor-Leste 2022 ne´ebe halo iha CCD, Dili. Photo: VIPTV/Agida dos Santos
banner 728x90

DILI, www.news-viptv.com – Prezidenti Republika, Jose Ramos-Horta akompana Primeiru Ministru Taur Matan Ruak offisialmente lansa programa Sensus Populasaun no Uma Kain 2022, Segunda (15/8/2022), iha Centro Convenções Dili.

Iha nia implementasaun, liu hosi Orsamentu Jeral Estadu 2022 Ministeriu Finansas ne´ebe nu´udar ministério ne´ebe responsável ba programa ne´e aloka osan US$ 3.1 Miliaun, no besik miliaun ida hosi parseiru desenvolvimento sira.

banner 336x280

Parseiru desenvolvimentu sira ne´e mai hosi Nasoen Unidas porezemplu hosi United Nations Population Fund (UNFPA) kontribui US$ 777,200.00, United Nations International Children`s Fund (UNICEF) US$ 56,000.00, United Nations Development Program US$ 25,000.00, UN Women US$ 24,000.00, no World Food Programme (WFP) US$ 20,000.

Ministru Finansas, Rui Gomes esplika, sensus populasaun ne´e importante ho ojetivu atu rekoilla informasaun hodi hatene lolos estrutura populasaun to´o iha nível aldeia no sukus.

“Informasaun hirak ne´e importante atu permite governu trasa politika publikas ne´ebe orienta ka responde ba estrutura populasaun ne´e rasik,” dehan Rui Gomes.

Presidente Republika, Jose Ramos-Horta husu ba povu tomak atu fo informasaun los iha Sensus Populasaun no Uma Kian 2022. Photo: VIPTV/Agida dos Santos

Nu´udar xefi estadu, Jose Ramos-Horta apela ba xefi aldeia, xefi sukus no prezidenti munisipiu hotu atu kontribui halo mobilizasaun no sensibilizasaun atu komunidade sira hot-hotu tenki partisipa.

“Sensus ne´e baze importante teb-tebes para governu, ita hothotu, ita nia parseiru internasional sira, akademiku, jornalista, estudante sira hatene lolos retratu sosial, umanu, politiku rai ne´e nian. Fo baze para governu bele halo planefikasaun diak, fo resposta ba dezafiu ne´ebe rai ne´e infrenta,” dehan Prezidenti Republika, Ramos-Horta.

PR Horta deklara tan “Ne´e duni hau husu ba ita hot-hotu kontribui fo dadus lolos, fo resposta lolos ba ajenti ne´ebe halo perguntas.”

Tuir ajenda Sensus Populasaun no Uma Kain tinan 2022 sei hahu iha 4 Setembru to´o 5 Outubru ho involvimentu staff hamutuk ema nian 3.424.

Hosi numeru sensus populasaun ikus iha tinan 2015, rejista total populasaun Timor-Leste hamutuk 1.167.242 (Mane: 588.561, Feto: 578.681). Antes ne´e iha tinan 2010, total populasaun Timor-Leste hamutuk 1,066,409 (Mane: 544.198, Feto: 522,242).

  • Share

Leave a Reply

Your email address will not be published. Required fields are marked *

error: Content is protected !!