Laiha Rekonesementu Estadu, Governu La Responsabiliza Timoroan Sira Buka Servisu iha Europeia

  • Share
Timoroan sira toba deit iha jardim Portugal. Photo: Facebook

DILI, www.news-viptv.com – Kondisaun susar no terus ne´ebe Timoroan sira infrenta iha Portugal hodi sai viral ba sira nia situasaun moris atual ne´ebe toba deit iha fatin publiku, estadu kontinua la responsabiliza Timoroan sira ne´ebe buka servisu iha europeia, tambá governu laiha konesementu ba sira nia prezensa iha Portugal.

Vise Ministru Negosiu Estranjeiru, Julião da Silva hateten, hanesan Timoroan ne´ebe diak tenki buka informasaun lae antes ba. Informasaun lolos bele husu ba Ministeriu Negosiu Estranjeiru no Kooperasaun.

banner 336x280

“Hanesan Timoroan ne´ebe diak husu informasaun, labele ba deit. Ita bo´ot sira agora hare, Portugal sira ne´eba ne´e laos Timoroan ga. Agora se maka ulun moras, estadu. Se maka organiza,  Timoroan ida ne´ebe prejudika Timoroan seluk, kestaun estadu ne´e iha, governu neé iha, husu informasaun, MNEK ne´e hare ema nunka mosu, iha ona Portugal dehan MNEK, eh, MNEK iha det o nia sorin sa´e deit táxi 1 dolar o lakohi mai, o ba ribuan dólar depois dehan MNEK iha ne´ebe, ne´e lojika laiha,” dehan Julião da Silva ba jornalista sira, Segunda (8/8/2022), iha Palasiu Presidensial Bairo Pite, Dili.

Governu, esplika Julião, sei proteje nia sidadaun wainhira iha konesementu hosi estadu, hanesan estudante bolsuleiru sira, traballador iha Koreia Sul ho Australia.

“Pilemenus kuandu nia hetan bolsu estudu, nia ba estadu hatene, MNEK nia papel proteje sidadaun sira, ou trallabador iha Koreia no Australia, ita boot sira hetan protesaun estadu. Ita boot sira ba illegal, ita la hatene, problema tia,” nia dehan.

Tamba ne´e, kona ba Timoroan nain 21 iha Thailandia, membru governu ne´e husu ba sidadaun sira ne´e atu hakbesik an ba embaixada Timor-Leste iha Thailandia hodi buka informasaun ba kompana ne´ebe sira atu servisu ba.

“Favor habesik ita nia an ba embaixada iha Thailandia. Ita lahatene, sira ba halo saída, kontratu iha ga lae. Mai MNEK hatudu kontatu dehan ami hetan kontratu ida hosi kompana ida hanesan ne´e, MNEK komunika ita nia embaixada iha Thailandia para buka ajensia ne´e iha ka lae, legal iha Thailandia lae, kualker pais ida, laos Thailandia deit, ba tiha nonok deit, depois husu fali estadu, lojika nee laiha,” nia dehan.

Nune´e mos Prezidenti Republika, Jose Ramos-Horta apela ba sidadaun Timor-Leste diak liu wainhira hakarak servisu iha railiur bele liu SEPFOPE nia programa ba mobilidade Traballador sira, duke monu ba lasu ema hirak ne´ebe estraga det ema.

Foin lais ne´e, Ministra Negosiu Estranjeiru no Kooperasaun, Adaljiza Magno iha nia hasoru malu ho Ministra Estadu ba assuntu Asia no Mediu Oriente Reinu Unido nian, Amanda Milling wainhira partisipa iha Forum Rejional ASEAN deklara katak Reinu Unidu labele realiza kooperasaun iha mobilidade traballador Timoroan sira ba iha Inglatera tambá governu sira nian iha skema global foun.

Iha fulan hira nia laran, ikus-ikus ne´e, sidadaun Timoroan sira barak maka desloca ba Portugal hodi buka servisu no balun tenta tama Inglatera ho pasporte Timor-Leste maski nasaun refere la autoriza sidadaun Timor-Leste buka servisu tuir lei ne´ebe vigora iha sira nia rain.

Writer: MARTINS, Natalina & SARMENTO, NaomiEditor: DOS SANTOS, Agida
  • Share

Leave a Reply

Your email address will not be published. Required fields are marked *

error: Content is protected !!