La Hetan Karta Kondusaun, Bankada PD Husu MTK Solusiona Motorista Non-Alfabeto

DILI, www.news-viptv.com – Bankada Partidu Demokratiku (PD) iha plenaria Segunda (12/2/2024) husu ba Ministeriu Transporte no Komunikasaun (MTK) atu solusiona motorista non-alfabeto (lahatene lee no hakerek) nune’e sira mos bele hetan karta kondusaun.

Deputada Bankada PD, Maria Teresa Gusmão hateten, tuir Diploma Ministerial Kodigu Estrada Numeru 120/2006 hateten katak motorista ne’ebe la hatene lee no hakerek la bele hetan karta kondusaun.

“Husu para atu bele altera tiha, nune’e hamosu fali rezolusaun ou dekretu lei ruma para bele fo dalan ba sidadaun motorista non-alfabeto,” dehan Deputada Maria Teresa Gusmão, Segunda (12/2/24) iha uma fukun Parlamentu Nasional, Dili.

Kestaun ne’e deputada PD ne’e levanta tamba hetan informasaun hosi Diresaun Nasional Transporte no Terrestre (DNTT) Munisipiu Baucau ne’ebe kobre Munisípiu Viqueque no Lautem husu ba parte relevante atu bele haree kestaun hirak nee.

“Ho razaun katak sidadaun maioria veteranus nia oan ne’ebe uluk la eskola tamba uluk hetan persegisaun nia laran konsekuensia husi inan aman no familia iha aí laran nune’e sira la bele ba eskola,”  nia hateten.