Kuarta Semana Oin, KM Sei Harii Estrutura Foun RAEOA

DILI, www.news-viptv.com – Hafoin simu ekipa tranzisaun Rejiaun Administrativa Espesial Oecusse Ambeno (RAEOA), Xefi Governu informa kuarta semana oin Konsellu Ministru (KM) sei harii esturtura foun ba RAEOA hodi halao servisu tuir programa Orsamentu Jeral Estadu 2024).

Primeiru Ministru (PM) Kay Rala Xanana Gusmão hafoin simu relatoriu hosi ekipa tranzisaun RAEOA informa governu sei servisu hamutuk ho estrutura foun ne’ebé sei mai tanba komprimisu IX Governu nian katak iha tinan lima-ne’e hakarak kria kondisaun ne’ebé di’ak la’ós de’it iha Oécusse maibé mós iha munisípiu sira hotu.

“Enkontru ne’e ita dehan termo de interno katak iha buat hot-hotu husi uma, estrutura no mos to’o osan. Ne’ebe ohin sira halo ona relatório ida ami hare hamutuk ona, Ami mos iha planu ida atu hari estrutura foun iha Oecusse hodi halao servisu. Tamba ne’e Kuarta mak imi foin rona resultadu,” hateten PM Xanana ba jornalista sira iha hafoin inkontru ho ekipa tranzisaun RAEOA hamutuk ho Ministru Administrasaun Estatal, Tomas Cabral, Palacio do Governo, Dili, Sexta (5/1/2024).

Koordenador Ekipa Tranzisaun RAEOA, Sebastião José Luis dos Santos Pereira hateten hafoin Prezidenti RAEOA, Arsenio Bano ho nia estrutura rezigna aan iha 22 Novembru 2023, ekipa rekomenda katak tenki iha duni estrutura foun hodi bele lidera administrasaun iha RAEOA.

“Ohin ami apresenta relatório ba sua excia Primeiru Ministru konaba servisu hotu ne’ebe ami halao ona no mos ohin ami rekomenda ba primeiro ministro tenke hari estrutura foun tamba foin lalais 22 Novembro ne’e estrutura anterior sira haruka ona karta resignasaun mai PM Xanana Tamba ne’e tenke hari estrutura foun iha RAEOA,” esplika Sebastião Pereira.

Iha sira nia relatoriu, rekomenda mos Oe-Cusse oan balun ne’ebe potensial bele mos uza hodi tuur iha estrutura foun lidera RAEOA.

Hola parte mos iha ekipa Tranzisaun RAEOA maka Dulce Guterres Junior, Agostinho Caet, Francisco da Costa Soares ‘Borlaku’, Benedito Escorial Fernandes, Januário Maia Guterres no Ricardo Alves Delgado.