Konsuladu TL iha Kupang Repatria Ona Lutgardia Jeronimo

DILI, www.news-viptv.com – Konsuladu RDTL iha Kupang repatria ona minór idade ho naran Lutgardia Elconsenza Alves Jeronimo ho idade tinan 5, mai ona Dili Timor-Leste. MNEK liuhosi Diresaun Nasionál Asuntu Konsulares no Komunidade Timorense (DNACCT-sigla portugéz) entrega ona ba Nelia Maria Jose Alves, hanesan inan ba minór idade ne’e.

Durante ne’e minór idade Lutgardia sai ona disputa husi Nelia Maria Jose Alves (Inan) ho  Julio Antonio dude Geronimo (aman) kazu ne’e lori to ba iha Tribunál Distritál Dili.

Desizaun hosi Tribunál Distritál Dili iha 24 Setembru 2020, favor ba Nelia Maria Jose Alves hanesan inan mak kuida (hak asuh) menór idade refere. Maibé infelizmente menór idade nia avo feto ho avo mane lori no asssegura hela iha Kupang-Indonézia.

Bazea ba pedidu hosi Nelia Maria Jose Alves (Inan) ba MNEK atu koordena ho Misaun RDTL iha Indonézia (Embaixada no Konsuladu) atu bele halo aprosimasaun ho menór idade nia avo feto ho avo mane para bele autoriza menór idade fila fali mai Timor-Leste tuir desizaun Tribunál ne’ebé mak iha ona.

Liu hosi liña koordenasaun no koperasaun servisu durante ne’e, entre MNEK liuhosi DNACCT ho Embaixada RDTL iha Jakarta, Konsuladu RDTL iha Kupang, Embaixada Indonézia iha Dili, ALFAELA, AJAR ho Autoridades Imigrasaun Timor-Leste ho Indonézia menór idade refere bele fila mai hamutuk fali ho nia inan Sra. Nelia ho Familia sira hotu.