DILI, www.news-viptv.com – Konsellu Ministru iha sorumutuk Kuarta (26/4/2023) aprova projetu Dekretu Governu nian, ne’ebé aprezenta husi Ministra Negósius Estranjeirus no Kooperasaun, ne’ebé Regulamenta Medida sira ba Protesaun Sidadaun Timoroan iha Rai-li’ur.
Iha komunikadu imprensa ne´ebe redasaun simu hosi Presidensia Konsellu Ministru, esplika katak ho Dekretu Governu ida-ne’e halo regulamentasaun ba medida protesaun ba sidadaun timoroan sira iha rai-li’ur, ne’ebé preve iha Dekretu-Lei n. 77/2022, loron 26, fulan-outubru, permite ninia aplikasaun ba parte servisu administrasaun públika nian.
Maske kuadru normativu fundamentál ne’ebé presiza hodi fó protesaun ba timoroan sira iha rai-li’ur aprova ona, presiza halo aprovasaun tan ba norma jurídika sira ne’ebé sei operasionaliza aplikasaun konkreta husi medida protesaun sira ne’ebé temi ona.
“Tuir diploma ne’ebé refere, konstitui ho medida sira ba protesaun sidadaun timoroan iha rai-li’ur, no hodi fó tulun karik iha kazu katástrofe naturál, ka ho perturbasaun grave ba orden públika, hodi lori filafali mai timoroan sira iha rai-li’ur, apoiu ba emerjénsia ba alojamentu, apoiu hahán emerjénsia nian no apoiu karik iha kazu tama prizaun ka detensaun,” sita komunikadu ne´e.
Sidadaun Timoroan sira ne´ebe dadauk ne´e barak hela iha rai liur hanesan nasaun Reinu Unidu, Irlanda do Norte, Portugal, Australia, Indonesia, Koreia Sul, no nasaun europeia balun.