Konsellu Ministru Aprova Akordu ho KOIKA ba Projetu Agrikultura

DILI, news-viptv.com – Konsellu Ministru liu hosi nia sorumutuk loron 15 Setembru 2021 aprova ona akordu ho KOIKA ba projetu iha Area agrikultura.

Akordu ida entre Ministériu Agrikultura no Peskas no Ajénsia Kooperasaun Internasionál Koreia “KOIKA”, kona-ba projetu, ne’ebé sei hala’o entre tinan 2021 to’o 2025, atu hadi’a sekuénsia valór agríkola liuhusi partisipasaun agrikultór sira nian iha Timor-Leste.

Akordu ne’e prevee mós asisténsia téknika no fornesimentu materiál sira, husi KOIKA, ho montante totál besik dolar amerikanu millaun neen.

Ba akordu ne’e Konsellu Ministrusfó podér tomak ba Ministru Agrikultura no Peskas, Pedro dos Reis, atu asina akordu ida-ne’e.

Alende ne’e, Konsellu Ministrus mós delibera atu autoriza loke prosedimentu aprovizionamentu nian relasiona ho obra konstrusaun ba instalasaun foun Institutu Politékniku Betano (IPB) nian, bazeia ba projetu  deliberasaun ne’ebé aprezenta husi Ministru Ensinu Superiór, Siénsia no Kultura,  Longuinhos dos Santos.

Projetu konstrusaun IPB ne’e ho objetivu fundamentál atu hadi’a kualidade edukasaun ensinu superiór nian no aumenta kapasitasaun rekursus umanus liu-liu iha área esensiál sira ba interese nasionál.

Nune’e mos Konsellu Ministrus delibera atu autoriza selebrasaun ba akordu finansiamentu ida ho Banku Dezenvolvimentu Aziátiku, relasiona ho Projetu Espansaun Aeroportu Internasionál Prezidente Nicolau Lobato. Konsellu Ministrusfó podér tomak ba Ministru Finansas, Rui Augusto Gomes, hodi asina akordu ne’e.

Projetu ne’e prevee estensaun ba pista aterrajen, torre kontrolu foun ida no reabilitasaun ba instalasaun sira seluk.

Vise-Primeiru-Ministru no Ministru Planu no Ordenamentu, José Maria dos Reis, aprezenta ba Konsellu Ministrus opsaun polítiku-lejizlativa ne’ebé sai hanesan baze ba kriasaun Zona Espesiál Protesaun Ambientál no Ekolójika sira nian.

Zona hirak ne’e hanesan área lubun ida ne’ebé, ho valór no sensibilidade tuir ekolójiku nia haree ka husi espozisaun risku naturál sira, hanesan objetu protesaun espesiál. Opsaun sira ne’ebé propoin ona ho objetivu atu kria rejime jurídiku espesiál hodi estabelese konjuntu kondisionalizmu sira ba okupasaun, uzu no transformasaun rai, no mós atu determina uzu kompativel no inkompativel sira.

Objetivu prinsipál sira husi medida ne’e mak atu proteje rekursu naturál sira hanesan bee no rai, prevene degradasaun rekarga akiférus, prevene risku naturál sira (inundasaun, cheias, erozaun solu no deslizamentu vertente) no proteje ekosistema sensivel sira.