Kongressu P-FM Versaun Egidio de Jesus Illegal

DILI, www.news-viptv.com – Kongressu Nasional Partidu Frenti-Mudança (P-FM) neébe lidera hosi eis Prezidenti Internu, Egidio de Jesus konsidera ilegal no laiha baze legal.

Konsidera ilegal tambá Jornal da Republica iha Sexta-Feira, 1 de Julho 2022 Serie II, nº 26 publika ona rezultadu kongressu nasional P-FM neébe lidera hosi Ricardo Cardoso Nheu nudar prezidenti partidu no Daniel Pereira nudar sekretariu jeral rezultadu kongressu nasional neébe realiza iha 27 to´o 29 Maiu 2022 iha Salaun Laline-Lariguto CNE, Dili ho hetan prezensa hosi Prezidenti CNE, Jose Belo.

Iha kongressu nasional neé alende hili Ricardo Nheu ho Daniel Pereira, hili mos Julio Soares Madeira nudar vise prezidenti I, Manuel da Gama ba vise prezidenti II, Angelmo Vitor ba vise sekretariu I no Isabel Ximenes ba vise sekretariu II.

“Diresaun Nasional eleitu neébe simu ona posse iha loron 29 Maiu 2022, membru komisaun politika nasional (CPN) neébe simu ona posse iha Loron 18 Junu 2022, hamutuk ho nia militante kuadros sira tomak hakarak hato´o ba publiku katan ami rezeita total Egidio de Jesus neébe realiza enkontru ida iha ninia uma neébe hanaran kongresu datolu neé, ami konsidera kongresau neé invalidu tamba partidu Frente Mudansa suspende ona Egidio de Jesus husi nia kargu prezidente interinu bainhira kongresu neé realiza, no estabelese ona meza kongressu, estrutura tuan (lideransa executive) sira automatikamente sai demisioner. Nune Egidio de Jesus laiha ona kompetensia atu lidera kongresu ka foti desizaun relasaun ho Partidu Frente Mudança,” deklara Sekretariu Jeral P-FM, Daniel Pereira ba jornalista sira iha konferensia, Kuarta (13/7/2022), iha Pantai Kelapa, Dili.

Tamba neé nia dehan, Egidio de Jesus laiha ona dalan atu konsidera aan nafatin nudar prezidente interinu tamba desizaun maioria hili ona lideransa foun liu husi kongressu nasional neébe realiza iha 27 to´o 29 Maiu 2022.

“Lideransa foun P-FM legal mak publika ona iha jornal da republika iha loron 1 de Jullu 2022,” dehan Daniel.

Lideransa P-FM foun sei esforsu atu bandu Egidio de Jesus ho nia equipa labele uza tan atributu partidu nian.

“Ami sei hapara nia iha kualker aktividade partidu nian, ami sei prosesa Egidio tuir lei neébe vigor iha nasaun Timor-Leste,” deklara Daniel.

Sekretariu Jeral P-FM neé esplika, antes neé Egidio de Jesus iha ona problema internal no lori toó tribunal ba akuzasaun falsu neébe kestiona ho eis sekretariu jeral Ricardo Nheu atual Prezidenti P-FM neébe dehan laos sekretariu jeral partidu nian no ikus la provadu iha tribunal.