Komunidade Fatu’u Atauro Simu Apoiu Umanitaria husi Prezidenti Republika

DILI, www.news-viptv.com – Prezidente Repúblika, Jose Ramos-Horta liu husi assesoria Sosiedade Sivíl no Apoiu Sosiál (SSAS-PR) ne’ebé lidera husi assesór Quintiliano Moníz, Kuarta (3/7/2024), distribui apoiu humanitária hanesan nesesidade báziku no zeradór hamutuk ho printer no Laptop ida inklui ‘’life-Jacket’’ iha tasi ba komunidade iha Fatu’u, Aldeia Ili-Duadoru, Suku Bikeli, Munisípiu Atauru.

Iha komunikadu imprensa ne’ebe redasaun asesu, iha serimónia entrega, Quintiliano esplika katak Prezidente Repúblika rona Fatu’u nia difikuldade no hakarak mai vizita.

‘’Iha vizita da-uluk iha ne’e (Fatu’u), ha’u lori ita bo’ot sira nia difikuldade ba hato’o iha Prezidente Repúblika, Jose Ramos-Horta, hanesan ita hotu nia Prezidente Repúblika atu simu povu hotu-hotu nia difikuldade. Bainhira ha’u hato’o, Xefe Estadu deside hakarak mai vizita no deskansa iha ne’e. Maibé Problema iha transporte marítima, nune’e delega ha’u mai iha ne’e atu fó apoiu nessesidade báziku no jeradór no laptop ba pastór sira hodi utiliza ba selebrasaun missa tuir fiar protestante nian,’’ dehan Assesór Quitiliano hafoin entrega nessesidade báziku.

Quintiliano salienta katak, “Ha’u hato’o mos imi nia difikuldade kona-bá bee-mos no eletrisidade maibé Prezidente Repúblika sei esforsu atu hamutuk ho governu rezolve Be-moos maibé kona-bá eletrisidade, Xefe Estadu sei buka dalan atu oferese ba Fatu’u, solár Painel ba kada uma-kain”.

Tuir planu, Prezidénsia Repúblika hamutuk autoriedade Atauru sei organiza atu Prezidente Repúblka mai vizita iha Fatu’u no area izoladu sira iha Atauru hodi hatene kondisau moris husi komunidade iha area Fatu’u, Adara no Atekru inklui fatin izoladu sira ne’ebé la assesu ba estrada iha Atauro.

Iha oportunidade ne’e, nassesidade bázika ne’ebé oferese mak hanesan Fós ho totál karón 70, Mina ba tein hamutuk 70 inklui susben kaixa 7 no Jeradór ida hamutuk ho Latop no printer no jacket salva vida iha tasi ho totál 30. Mobilizasaun ba sasan hirak ne’e, tula ho rô tolu husi Portu Beloi mak ba Fatu’u.

David Soares hanesan reprezentante komunidade expressa katak orgullu ho ajudu sira ne’ebé iha husi Prezidente Repúblika.

‘’Sente orgullu ho prezensa husi Prezidénsia Repúblika liu husi assessór SSAS-PR, no ami agradese ba apoiu sira ne’ebé ohin oferese ba komunidade 241 iha Fatu’u,’’ Expressa Nia.

Entretantu, Fatu’u nu’udár area izoladu ne’ebé la iha assesu ba estrada, no dézde bei-ala nia tempu la iha karreta no motorizada ruma ne’ebé tama iha Fatu’u tamba haleu ho foho no tasi, la iha assesu ba bee-moos, telekomunikasaun no eletrisidade. Úniku transporte mak Rô. Utiliza rô, ba buka moris (dezenvolve ekonomia uma-laran), assesu ba merkadu, kuru bee, tula rai-henek no atividade sira seluk.