Kompete ba Kongressu Nasional FFTL, Francisco Kalbuadi Sei Fila ba Timor-Leste

DILI, www.news-viptv.com – Porta voz ekipa susesu Francisco Kalbuadi Lay kandidatura Prezidenti Federasaun Futebol de Timor-Leste (FFTL), Aleixo Monteiro “Avansa” informa sira nia kandidatu sei fila ba Timor-Leste iha tempu besik.

Avansa esplika, dadauk ne’e Francisco Kalbuadi Lay sei halao hela knar nudar Vise Prezidenti ASEAN Football Federation no sai Prezidenti Kompetisaun ba Jogu AFF U-23 Championship ne’ebe sei realiza iha Kambodia fulan oin.

Porta voz ne’e mos informa, dadauk ne’e Francisco Kalbuadi prepara hela kondisaun iha Qatar hodi sai fatin Sentru Treinu ba selesaun nasional sub-23 ne’ebe sei kompete iha Kambodia.

Entertantu Prezidenti Assosiasaun Futebol Dili Weste, Ipolito Soares lamenta ho prestasaun servisu Prezidenti FFTL atual ne’ebe la konsege lori mudansa diak ba FFTL, no la konsege uza oportunidade diak ba programa FIFA nian ne’ebe hakarak finansia konstrusaun estadiu standar internasional iha Timor-Leste.

Ho planu foun ba FFTL iha tinan 5 mai, Prezidenti Assosiasaun Futebol Munisipiu Aileu, Ricardino Sarmento dos Reis pronto ona fo voto konfiansa ba Francisco Kalbuadi Lay hodi asumi hikas kargu Prezidenti FFTL nune’e bele kria ona kampu futebol munisipiu hodi bele sai sentru ba treinamentu futebol iha kada munisipiu