Komemorasaun Loron Masakre Santa Cruz, Xefi Estadu Louva Sakrifisiu Juventude Resistensia

DILI, www.news-viptv.com – Prezidenti Republika Jose Ramos-Horta fo nia omenajem ba jovem resistensia Timoroan sira ne’ebe fo vida Timor-Leste nia ukun rasik aan durante okupasaun Indonesia, inklui sira ne’ebe sai vitima ba loron masakre santa cruz iha 12 Novembru 1991.

Iha selebrasaun loron nasional juventude ba tinan 19 no komemorasaun loron masakre santa cruz ba tinan 33 ne’ebe halao iha Semeteriu Santa Cruz, iha nia deskursu, xefi estadu mos rekonese ba involvimentu ema estranjeiru no jornalista rai liur sira nian kontribuisaun iha Timor-Leste nian luta ba ukun rasik an.

Ho komemorasaun ne’e, Prezidenti interinu Comite-Doze Novembru, Filipe Rodriguez apela ba juventude Timoroan sira, nu’udar kontinuador ba nasaun Timor-Leste, atu estuda no labele kotu eskola hodi bele lori Timor-Leste ba futuru ne’ebe diak.

Jaime da Silva Soares nu’udar familia husi Deonizio da Silva husu ba governu no komite-doze atu buka nafatin ruin vitima masakre ne’ebe to’o ohin loron sedauk hetan.

Grazinha da Silva nu’udar koordenador ba organizasaun Juventude Hadomi Natureza louva ba luta juventude sira uluk iha tempu resistensia no nudar juventude kontinuador pronto atu dezemvolve Timor-Leste iha era ukun rasik an.