Koligasaun CNRT-PD, Assanami: Pozisaun Saida deit PD Prontu

Dili, www.news-viptv.com – Prezidenti Partido Democratico (PD), Mariano Assanami Sabino deklara katak PD prontu simu pozisaun saida deit maka Partidu CNRT sei fo iha formasaun Governu Koligasaun CNRT-PD.

“Pozisaun saida deit PD prontu,” hateten Assanami ba jornalista sira hafoin hasoru Prezidenti republika Jose Ramos Horta relasiona ho formasaun IX Governu Konstitusional, Kuarta (7/6/2023) iha Palasiu Prezidensial, Dili.

Ema numeru ida iha PD ne´e rekonese katak ho kadeira 6 ne´ebe PD hetan iha Eleisaun Parlamentar 21 Maiu 2023, CNRT nu´udar partidu mais votadu ho kadeira 31 maka iha autoridade liu hodi deside.

“CNRT maka iha autoridade ba ida ne´e, maibe sei koalia hamutuk no sei desidi hamutuk,” dehan Assanami.

Assanami mos esplika katak prezensa PD nian hasoru xefi estadu hodi fo resposta ba lalaok PD nia pozisaun ho CNRT katak partidu rua komitmentu hodi forma governu hamutuk.

“PD preparadu no prontu,” nia dehan.

Iha 30 Maiu 2023, PD liu hosi nia Sekretariu Jeral Antonio da Conceição Kaloha lori karta offisial ba rezultadu Konsellu Superior PD ne´ebe prontu atu hamutuk CNRT forma governu no iha 5 Junu 2023, Sekretariu Jeral Partidu CNRT, Francisco Kalbuadi Lay mos lori karta CNRT nian ne´ebe asina hosi Xanana Gusmão nu´udar Prezidenti Partidu CNRT ho nia rasik hodi afirma, CNRT prontu lao ho PD iha formasaun IX Governu Konstitusional.

“Ohin ami mai iha ne´e atu reafirma ho karta ne´ebe iha 30 Maiu ne´ebe lori hosi Sekretariu Jeral PD, partidu rua ne´ebe hetan fiar hosi povu, ohin lokoraik ami reafirma partidu CNRT prontu halo koligasaaun ho PD,” dehan Francisco Kalbuadi, Segunda (5/6/2023) iha Sede Nasiona Partidu Democratico, Kolmera, Dili.

Nia mos esklarese, CNRT ho PD laos koligasaun foun ne´ebe foin lao forma governu tamba iha ona esperensia hamutuk hodi lidera governu anterior.

“Partidu rua ne´e laos foin servisu hamutuk, desde 2007, PD maka CNRT, CNRT maka PD,” nia dehan.