KI Observa Notisias Balu Sensasional no Provokativu

DÍLI, www.news-viptv.com – Conselho de Imprensa (CI) nudar orgaun reguladora komunikasaun sosial durante periodu eleisaun prezidensial observa notisias balu ne’ebe publika hosi produtu jornalista sira nakonu ho notisias sensasional no provokativu.

“Iha mos notisias balu ne’ebe CI konsidera sensasional no provokativu ne’ebe la kontribui ba paz no estabilidade iha rai laran tamba nakonu ho opiniaun jornalista ka editor nian konsidera hanesan propaganda politika iha periodu eleisaun prezidensial nian,” dehan Expedito Dias Ximenes, Prezidenti Interinu CI ba jornalista sira iha konferensia imprensa, Kinta (25/3/2022), iha Edifisiu CI, Quintal Bo’ot, Dili.

Expedito mos hateten, liu hosi observasaun seluk, kobertura no publikasaun notisia, programa no reportagen direta (live streaming) meio komunikasaun social iha periodu kampana politika la fo biban balansu ba kandidatu hotu-hotu, maibe barak-liu foka deit ba figura boot sira ne’ebe hetan apoiu husi partidu politiku sira.

Ho rezultadu monotorizasaun ne’e, CI mos hola pozisaun no foti asaun fo  samada ba meiu komuniksaun social no jornalista sira ne’ebe komete infrasaun hasoru kódigu étika jornalista, Lei komsos, matadalan reportajen eleitoral no matadalan midia social ba jornalizmu.

“Sei fo sansaun forte ba jornalista no meiu komunikasaun social ne’ebe komete infrasaun grave hasoru kódigu étika jornalístika, lei komsos,matadalan reportajen eleitoral no matadalan mídia social ba jornalizmu,” dehan Diretor Ezekutivu CI, Rigorberto Monteiro CI