KHUNTO Levanta iha Plenaria PN, Modelu Imoral Foinsa’e Namora Malu ho Dansa

DILI. www.news-viptv.com – Hare’e ba hahalok foinsa’e sira ne’ebe laiha moral wainhira namora malu iha fatin publiku, Bankada KHUNTO foti kestaun ne’e hodi levanta iha Plenaria Parlamentu Nasional (PN), Segunda (1/7/2024).

Laos deit ba foinsa’e sira nia modelu imoral foinsa’e sira namora malu, Deputadu Bankada KHUNTO, Antonio Verdial Sousa mos kestiona moral ferik-katuas sira ne’ebe mos laiha moral tamba impaktu negativu globalizasaun nian.

“Ne’e mak ami hakarak levanta iha plenaria. Ida ohin hodi alerta ba ita hotu, ida namora malu iha tasi ibun, ai-Laran, iha fatin publiku sira, hahalok imoral rua dansa iha festa sira ne’ebe maka hatudu hahalok sira ne’ebe ladun saudavel no feto sira ne’ebe hatais gosta hatudu isin lolon ne’ebe sensitivu iha fatin publiku no iha servisu fatin,” dehan Antonio Verdial Sousa.

Ho hahalok immoral foinsa’e sira ne’e, Bankada KHUNTO husu ba PN atu kria lei regulamentu hodi kontrola sira ne’ebe hatudu hahalok imoral no hatais ne’ebe la diak iha fatin publiku.

“Bankada KHUNTO dispensa ema hotu nia direitu no Liberdade no rekonese mos ba mudansa globalizasaun sira no KHUNTO ne’ebe moris ho mehi ida atu hatutan ba avo beiala sira uluk no bandu sidadaun sira uluk nia direitu no liberdade ba pratika hahalok imoral,” nia hateten.

Mundu ohin loron, deputadu ne’e esplika, foinsa’e barak laiha ona konesimentu ba kultura, hodi haluha nia abut (kultura).

“Husu ba Parlamentu Nacional ita hotu no Governu kria lei regulamentu hodi kontrola sira ne’ebe hatudu hahalok no hatais ne’ebe la diak hodi halo krimilizasaun no hahalok ne’ebe ladun diak iha fatin publiku, edukasaun kultural tenki lao nuudar atividade nasional,” hateten deputadu ne’e hodi deklara nafatin impaktu negativu globalizasaun nian sei estraga kultura original Timoroan sira.