Kazu Fangidae, Tribunal Liberta JIXP Tamba Idade Menor, RBC ba Prizaun Preventiva

DILI, www.news-viptv.com – Tribunál Judisial Primeira Instánsia Dili iha kazu hadau telefóne to’o rezulta Nituchia Fangidade lakon vida, liberta Arguidu JIXP tanba idade menor (tinan 16), no Arguidu na’in-lima seluk hetan aprezentasaun periodika, entertantu Arguidu RBC ho idade tinan 17 aplika medida koasaun prizaun preventiva.

Aprezentasaun Periódika bá Arguidu nain lima maka RML (idade 19), VCB (idade 17), PPDI (idade 19), YGCS (idade 19), no JSPHC (idade 17).

Tribunál foti dezisaun refere, hafoin audiénsia primeiru interrogatóriu judisial Ministériu Públiku promove Arguidu sira ho krime Roubu iha Artigu 253, no krime Tentativa Omesídiu Simples, iha Artigu 141, Lei Kódigu Penál Timor-Leste.

Ismael Assunção nu’udar advogadu ba Arguidu JIXP ho RBC hateten nia kliente rekoñese duni aktu krime ne’ebé sira komete iha 21 Maiu 2024, maizumenus tuku 8 kalan, iha área Pertamina, Pantai Kelapa, Díli.

Kona-bá krime Roubo no Tentativa Omesidiu Simples ne’ebé Ministeriu Publiku promove bá arguidu sira, Defensór Estaquio dehan, ne’e presiza halo tán investigasaun ne’ebé kle’an, atu nune’e bele deskobre nia verdade.

Iha rezultadu investigasaun kriminál ne’ebé prodús hosi Komandu PNTL ninia ekipa Inavestigadór sira iha Departamentu Investigasaun Kriminál, rezulta katak, hosi Arguidu na’in-7 ne’e, ida ho insial JIXP mak sai hanesan autór prinsipál, tanba utiliza material ai-tongka hodi selok motor ne’ebé Juliana kondús tula nia oan-feto (Fangidae). Maibé, wainhira to’o iha Tribunál fó liberdade kondisionál bá nia.

Kazu krime Roubo ho Tentativa Omesídiu Simples ne’e, akontese iha Tersa (21/05), maizumenus tuku 8 kalan, iha área Pertamina, Pantai Kelapa, Dili, uainhira Arguidu sira ho motorizada duni tuir vítima sira hosi kedas área Kampung Alor. To’o iha Pantai Kelapa, Arguidu sira ho ai-selok bá motor, to’o rezulta vítima nain rua ne’ebé kompostu hosi inan Juliana Elisabeth ho nia oan feto Nituchia Fangidae. Ikus, vítima sira tenke bá baixa iha HNGV, liu loron rua, Nituchia Frangidae hakotu iis, enkuantu matebian nia inan, dadaun ne’e kontinua hala’o tratamentu bá nia saúde tanba kondisaun gráve.