Setor Edukasaun no Justisa Sai Prioridade Portugal ba Dezenvolvimentu Timor-Leste

DILI, www.news-viptv.com  –  Rekonese Timor-Leste mos nu’udar pais ida ne’ebe uza Portugues nu’udar lingua nasional, Governu Portugal sei tau matan no fo prioridade Setor Edukasaun no Justisa ba dezemvolvimentu Timor-Leste.

“Projetu ne’ebé la’o ho susesu tebes maka kestaun edukasaun nian, sei kontinua servisu makaas iha área ne’e atu fó formasaun bá professór sira, biblioteka no kestaun lian Portugés inklui kontinua servisu iha área Lei, justisa no lejislasaun,” dehan Embaixadór Foun Portugal Iha Timor-Leste, Duarte Falé Costa de Bué Alves, hafoin aprezenta-an ba Primeiru-Ministru (PM), Kay Rala Xanana Gusmao, segunda (29/09/2025) iha Palacio do Governo, Dili.

Iha inkontru ho PM Xanana, embaixadór ne’e esplika, Portugal ho Timor-Leste sei kontinua halo diskusaun hodi aborda tópiku oioin, maibé atu dehan buat ne’ebé halibur nu’udár estadu membru Comunidade dos Países de Lingua Portuguesa mak presizamente lian Portugés.

Diplomata ne’e hatuur kompromisu atu kontinua kooperasaun ne’ebé estabelese ona entre Portugál ho Timor-Leste durante mandatu.

Embaixadór ne’e, konsidera CPLP liga ho kestaun lian komún ida no tasi, ne’ebé sai mós elementu komún fundamentál.  Ida-ne’e esensiál bá nasaun membru CPLP hotu.

“Iha Timór Governu tau importánsia bo’ot bá kestaun sira iha Ekonomia Azúl hanesan buat ne’ebé nia haree panfletu barak mak monta  iha sidade laran tomak, hodi reflete prosesu konsultasaun públika kona-bá estratejia Ekonomia Azúl nian,” dehan Embaixadór ne’e.

Tanba ne’e nia ho Xefe Governu mós diskute kona-bá oportunidade, difikuldade no dezafiu sira hosi ekonomia sira ne’ebé dezenvolve hela, no oinsá bele servisu hamutuk iha área ida-ne’e.

Embaixadór Duarte Alves nu’udár diplomata distintu ida ho karreira ida ne’ebé dura liu dékada rua dezde tama iha Ministériu Negósiu Estranjeiru Portugál nian iha tinan 1999.

Ninia esperiénsia diplomátika internasionál ne’ebé estensivu inklui destakamentu sira iha embaixada portugés nian iha Luanda, Bruxelas, no Tokyo, no mós nu’udár Adjuntu Reprezentante Permanente iha OECD Paris.

Portugál nia apoiu indispensável iha seitór krítiku sira hanesan edukasaun, justisa no defeza, kombina ho diálogu polítiku nível altu ne’ebé konsistente, halo parseiru internasionál Timor-Leste nian ida-ne’ebé vitál no duravel-liu.