Kalbuadi: Forum Negosius Internasional Sei Promove Setor Turismu TL

Dili, www.news-viptv.com  – Vise Primeiru-Ministru no Ministru Koordenador Assuntu Ekonomia, no mos Ministru Turismu no Ambiente, Francisco Kalbuadi Lay informa katak Forum Negosius Internasional ne’ebe sei realiza iha Timor-Leste sei promove setor turismu Timor-Leste nian.

“Ita nia objetivu husi forum ida ne’e atu promove ita nia rai, liliu iha area turismu no setor sira seluk,” dehan Francisco Kalbuadi Lay ba jornalista sira iha konferensia imprensa, segunda (20/11/2023), iha Palacio do Governo Dili.

Francisco Kalbuadi Lay mos esklarese, emprezariu sira ne’ebe sei partisipa iha forum ne’e alende emprezariu setor turismo, iha mos emprezariu hosi setor agrikultura, eletrisidade, no mos peskas.

Emprezariu sira ne’e, dehan ema numeru rua iha governasaun ne’e mai hosi ASEAN, Indonezia, Singapura, Malazia, Cambodia, Myanmar, Vietnam, Tailândia, China, Hongkong, Brazil, Australia, Korea, no Japaun.

Iha fatin hanesan, Prezidente CCI-TL , Jorge Serrano hateten, iha forum ne’e, CCI-TL sei sai parseiru governu nian iha area ekonomia, industria no negosius no Timor-Leste presiza duni iha investimentu hosi investidor rai liur hodi hamutuk dezemvolve Timor-Leste.

“Forum ne’e atu buka investimento bo’ot, laos atu loke fali loja enkuantu mundu mos akompanha Timor-Leste ho imajen diak no situasaun normal, entaun nasaun seluk tau konfiansa mai Ita maske ita iha merkadu ne’ebe kiik,” hateten Jorge Serrano.

Forum Negosius Internasional ne’e sei realiza iha 23 to’o 26 Novembru 2023.