Kail Ikan iha Mota Namlutuk, Lafaek Tata Mate Nascimento

DILI, www.news-viptv.com – Kazu lafaek hamate ema iha Timor-Leste akontese tan iha Postu Administrativu Lore, Munisipiu Lautem, vitima maka Nascimento Provinsial ne’ebe identifika nu’udar komunidade Aldeia Vailana, Suku Lore 1.

Akontesementu akontese Sexta (3/10/2025) wainhira vitima ho nia koleha nain 5 seluk halo atividade kail ikan iha Mota Namulutuk iha tuku 7 kalan.

“Vitima nia mate isin konsege hetan hikas iha Sabadu (4/10/2025) iha tuku 2 madrugada,” informa Porta-Voz Autoridade Protesaun Sivil (APC), Nelson Orleans ba jornalista sira iha konferensia imprensa wainhira atualiza dadus dezastre naturais ne’ebe akontese iha periodu 29 Setembru to’o 6 Outubru 2025.

Nelson Orleans esplika, durante periodu refere, APC rejista uma 14 komunidade nian hetan estragus. Uma 14 ne’ebe hetan estragus ne’e tamba kauza husi anin sobu iha uma 9 no ahi han iha uma 5.

“Prienxe kriteria 13, apoiu deit emerjensia 1, numeru ema afetadus 74, ema evakua 19,” nia dehan.

Uma 14 ne’ebe hetan estragus ne’e mai husi Munisipiu Aileu Anin Sobu 1, Ainaro Ahi han uma 1, Baucau Anin sobu uma 7, Liquiça Anin sobu Uma 1, RAEOA Ahi han uma 2, Viqueque Ahi han uma 2.

“Komando APC Munisipiu ho parseirus relevante fornese asistensia emerjensia ba família afetadus sira mak hanesan Ai-han no laos Ai-han. Komando Operasional Autoridade Protesaun Sivil (APC) munisipiu sira sei kontinua halo hela levantamentu detaillus kona-ba sasan ne’ebe estragus no lakon,” hateten porta-voz APC ne’e.

Ho uma estragus ne’e, APC rejista ona total vitima husi Janeiru to Outubru  2025, kuaze vitima iha 7,000 i tal.