Jerasaun 12 de Novembro Realiza Konsulta Masál iha MJDAK

Dili, www.news-viptv.com – Hodi komemorasaun loron nasional Juventude no masakre Santq Cruz, Jerasaun 12 de Novembro realiza konsulta masál iha areadores Ministeriu Juventude, Desportu, Arte no Kultura (MJDAK), Lecidere, Dili, Kinta (9/10/2023).

Prezidente Komisaun Organizadora, Nonica da Silva Gonsalves, hateten konsulta masál ne’e loke ba publiku, inklui mos ba familia no sobrevivente 12 Novembru.

“Aktividades ida ne’e ami hetan apoiu husi MJDAK ne’ebe mak fo apoiu tomak maia Ami hodi selebra aktividades ida ne’e,” hateten Nonica.

Ministru Juventude, Desportu, Arte no Kultura, Nelyo Isaac Sarmento iha nia deskursu hateten ho konsulta masál ne’ebe Jerasaun 12 de Novembro realiza bele ajuda komunidade no mos familia sobrivivente masakre Santa Cruz hodi check up sira nia saude.

“Fó agradese espesiál liu ba hau nia oan sira liu husi jerasaun 12 novembru ne’ebé realiza aktividade ida ne’e, iha ambitu halo refleksaun ba masakre 12 de Novembru nomos selebra dia nasionál ba juventude nian. Ita hamutuk fó hanoin ba malu katak saúde ne’e importante ba ita-nia moris,” dehan Ministru Nelyo Isaac.

Iha konsulta masál ne’e, Ministru orgullu tanba entre mediku sira ne’ebé mak fó asistensia iha konsulta masál ne’e mai husi sobrevivente 12 novembru nia-oan sira rasik.

“Dala ida-tan, husu ba hotu-hotu sente, tanba doutor sira iha ne’e atu halo asistensia saúde ba ita, sente katak buat ruma sofre karik mai hakbesik ba,” dehan ministru ne’e.

Sobrivivente masakre Santa Cruz, Bentu Ferreira sente kontenti ho atividade Jerasaun 12 de Novembro ne’ebe bele halo konsulta masál hodi fasilita moras nain sira.

“Husu konsulta ne’e labele para det iha komemorasaun, maibe iha loron seluk mos bele halo nafatin tamba povo presiza no dala barak atu ba konsulta iha privadu mos presiza osan tamba ne’e ho aktividade ida ne’e ajuda tebes ferik katuas no labarik sira,” dehan Bentu.

Atividade konsulta masál ne’e mak hanesan konsulta saúde jerál, matan, doasaun ran no terapi husi Rai Mor.

Iha komemorasaun loron juventude nasional no masakre Santa Cruz, Jerasaun 12 de Novembro hetan apoiu fundus hamutuk USD 24.000 hodi realiza atividade ne’ebe realiza oiha 27-28 Outubru no seminariu nasional, inklui konsulta massal.