Inundasaun iha Suku Luka, Uma Kain 14 Prontu Muda Hosi Fatin Risku Dezastre

DILI, www.news-viptv.com – Komunidade hamutuk uma kain 14 hosi aldeia Uma Bo’ot, Suku Luka, Munisipiu Viqueque ne’ebe afetadu tamba inundasaun ba future konkorda ona sai hosi fatin dezastre hodi muda ba fatin seluk.

Iha konferensia imprensa Diretor Gabinete Relasaun Externa no Komunikasaun, Cesario da Silva Marques informa, vitima dezastre naturais ne’e mos simu ona sasan apoia emerjensia no tempu besik sei simu rekoperasaun.

Alende ne’e, nia mos informa dadus dezastre ne’ebe akontese iha period 15-22 Abril, APC rejista hamutuk uma kain 30 maka hetan estragus. Uma kain 30 ne’e rejista iha Munisipiu Baucau iha uma 5 maka aat tamba hetan estragus hosi anin boot, Bobonaro anin bo’ot estraga uma 2, Covalima iha uma ida ne’ebe estragus tamba insendiu, Ermera anin bo’ot sobu uma 1, no rai halai tamba udan bo’ot estraga uma komunidade ida.

Uma rua iha Lautem mos APC relata hetan estragus tamba ida impaktu hosi anin bo’ot, no uma ida tamba insendiu. Udan bo’ot ne’ebe akontese iha Manatuto estraga uma komunidade ida hetan estragus, no Manufahi iha uma ida aat tamba anin sobu, no anin bo’ot mos estraga uma 10 iha RAEOA, inklui uma ida relata tamba insendiu no 1 tamba inundasaun. APC mos relata uma 3 iha Viqueque hetan estraga tamba anin bo’ot no ida tamba rai halai.