Indonesia Hakarak Hametin Kordenasaun Servisu iha Area Dezenvolvimentu Rural  Timor-Leste

DILI, www.news-viptv.com – Indonesia kontinua nia komitmentu hodi apoia no suporta Timor-Leste iha IX Governu Konstitusional hodi hakarak mos hametin servisu iha area dezemvolvimentu rural.

Assuntu ne’e hato’o hosi Embaixador Indonesia ba Timor-Leste, Octo Dorinus Manik hafoin hasoru malu Vice-Primeiro Ministro, Ministro Coordenadór dos Assuntos Sociais e Ministro Desenvolvimento Rural e Habitação Comunitária Eng. Mariano Assanami Sabino, Kuarta (16/8/2023), iha Palacio do Governo, Dili.

Iha enkontru nee, parte rua troka hanoin oinsá atu hametin servisu bilateral entre Governu Indonezia no Timor-Leste, liu-liu área importante sira neebé tutela direita ba Vise-Primeiru Ministru.

“Ohin ami mós koalia oinsá atu reforsa servisu sira, tanba nee ami tenta buka assuntu ida neebé ami bele hola parte iha dezenvolvimentu rural no abitasaun komunitaria nian,” dehan Embaixador Octo.

Enkuantu, Vise-Primeiru Ministru, agradese ba Estadu Repúblika Indonézia liu husi ninia embaixadór iha Timor-Leste neebé kontinua hatudu sira nia komitmentu hodi apoiu Timor nia dezenvolvimentu.

Timor ho Indonézia nudar nasaun vizijiñu neebé iha kooperasaun servisu neebé diak tebes iha area polítika, sosiu ekonomiku no kultural nian.

“Ohin enkontru nee ami koalia oinsá atu hametin relasaun servisu entre nasaun rua iha futuru, liu-liu oinsá atu hametin koordenasaun servisu iha area dezenvolvimentu rual no abitasaun komunitaria nian,” dehan Assanami.

Iha IX Governu Konstitusionál iha ona ministériu ida neebé espesial haree ba Dezenvolvimentu Rural nian, entaun aldeia no suku sira iha hotu rural neeba, durante nee governu liu husi nia pareseiru dezenvolvimentu hahú ona servisu iha kraik, agora tempu ona atu halo mapamentu hodi integra dezenvolvimentu, saida mak governu bele halo, no saida mak parseiru dezenvolvimentu sira bele halo iha futuru.