banner 1000x250

Hili Servi Estadu, F-FDTL no PNTL 961 Hakotu Relasaun ho GAM-GAR

  • Share
PM Xanana halo hela revista parada iha seremonia juramentu membru PNTL ho F-FDTL ne'ebe jura husik GAM-GAR hodi servi det estadu. Foto: Media GRP PNTL / Tomas M. Rodrigues
banner 728x90

DILI, www.news-viptv.com  –  Hodi fo konfiansa ba povu no nasaun ho servisu imparsial no ezekuta lei no ordem, membru FALINTIL-Forca Defeza Timor-Leste (F-FDTL) ho Polisia Nacional de Timor-Leste (PNTL) hamutuk 961 hili servi estadu no hakotu ona sira nia relasaun ho Grupu Arte Marsias (GAM) no Grupu Arte Rituais (GAR), no mos partidu politiku.

Dezisaun husik GAM-GAR ne’e, membru forsa hosi instituisaun rua ne’e hatudu liu hosi seremonia juramentu “Declaração de Compromisso de Honra” iha Primeiru-Ministru Kay Rala Xanana Gusmão ho Ministru Defeza, Pedro Klamar Fuik, Ministru Interior Francisco Guterres, Xefi Estadu Maior-Jeneral, Tenente Jeneral Falur Rate Laek no Komandante Jeral PNTL, Komisariu Henrique da Costa, Kinta (7/12/2023), iha Palacio do Governo, Dili.

banner 1000x250
Membru PNTL entrega nia atributu GAM ba PM Xanana. Foto Media PM

Hafoin juramentu membru institusaun rua ne’e mos sei asina karta deklarasaun ne’ebe iha asina deklarasaun ne’e reprezenta hosi Komandante Unidade Espesial Polisia (UEP) Superintendente Polisia Damião Correia, Ofisial F-FDTL, Komandante Batallaun Ordem Publika (BOP) Superintendente Assistente Silveiro de Araujo, Xefe Departamentu Tranzitu Seguransa Rodoviariu Nasional (DTSRN) Superintendente Assistente Luis da Costa.

Seremonia juramentu ne’e PM Xanana realiza iha ambitu komemorasaun loron invasaun 7 Dezembru hodi afirma ba membru instituisaun defeza no seguransa katak independensia ne’ebe Timor-Leste hetan liu hosi sakrifisiu Timoroan oan rihun ba rihun nia mate no ran, ne’ebe persiza hanoin hikas hodi hametin nasionalismu iha Timoroan hotu nian hanoin no laran, inklui servidor estadu sira.

Iha juramentu ne’e, membru PNTL ho F-FDTL pronto rezigna an rasik ho hasai hosi instituisaun sira nian wainhira involve an fali iha GAM no GAR.

PM Xanana wainhira apela ba membru PNTL ho F-FDTL iha seremonia jura husik GAM-GAR. Foto: Media PM

“Hakarak tuir arte marsiais entaun tenke entrega fila visa PNTL no F-FDTL nian. Se hakarak nafatin membru F-FDTL no PNTL, entaun tenke entrega fila atributu arte marsiais nian hodi hatudu nafatin imi nia konfiansa ba povu,” deklara PM Xanana iha nia deskursu.

PM Xanana informa katak, deklarasaun ne’e membru PNTL no F-FDTL halo hodi fó konfiansa ba povu no nasaun katak, forsa rua servisu imparsiál no independente hodi servisu no ezekuta lei no orden.

“Juramentu ne’e membru forsa rua hala’o hodi kumpre Konstituisaun RDTL, artigu 147 (Polisia ho forsa seguransa) tenke defende legalidade demokratika no garante seguransa interna ba sidadaun hotu no la inklina ba partidu no grupu ruma,” hateten PM Xanana.

Xefe Estadu Maiór-Jeneral F-FDTL, Tenente Jenerál Falur Rate Laek apela ba membru F-FDTL ne’ebe mesak jerasaun patriota sira atu kumpri sira nia juramentu tamba ba oin karik sei involve nafatin, F-FDTL sei foti prosesu.

“Ami identifika ona, maibe sira ba ne’ebe nafatin subar waihira hetan fila fali entaun prosesso lubuk ida atu hasai hosi membru,” deklara jeneral ne’e.

Lia hanesan mos hatoo hosi Komandante Jeral PNTL, Komisariu Henrique da Costa katak ba oin PNTL sei la tolera ona ho membru ne’ebe involve iha GAM-GAR.

“Deklarasaun ne’ebe ohin asina, hanesan prova eskrita, karik sira involve, bele prosesa,” dehan Komisariu Henrique.

Hamutuk membru F-FDTL nain 131 no membru PNTL nain 282 maka hola prezensa iha seremonia juramentu ne’e.

Writer: BARRETO, Lucitania & FATIMA, NuryantiEditor: MEILANA, Evangelisto Santos
  • Share

Leave a Reply

Your email address will not be published. Required fields are marked *

error: Content is protected !!