DILI, www.news-viptv.com – Plan Internasionál iha Timor-Leste liu husi nia peskiza deskobre katak kaben sedu no isin-rua sedu kontinua aumenta iha Timor-Leste ne’ebé konsidera hanesan risku bo’ot bá nasaun.
Ho risku ba nasaun ne’e, Fatima Estrela Soares, Interim Country Director PLAN Internasional Timor-Leste ho Embaixador Plan Internasional ba Foin Sa’e no Diversidade, Kay Olo Sword Gusmão wainhira hasoru malu ho Primeiru-Ministru Xanana Gusmão, xefi governu husu ba Plan Internasional atu hare’e nafatin assuntu ne’e ho seriu no tau prioridade ba programa servisu nian.
“Estudu ida katak kaben sedu, isin rua sedu aumenta iha Timor-Leste ne’e fo risku boot, atu bele hare asuntu ne’e sai prioridade atu hare labarik sira bele akaba universidade no eskola sekundaria hodi kontinua sira nia estudu,” hateten Fatima Soares ba jornalista sira, Segunda (3/2/2025) iha Palacio do Governo, Dili.
Primeiru-Ministru Kai Rala Xanana Gusmão husu bá Plan Internasionál atu prepara planu estratéjiku no planu anuál hodi aprezenta iha Konsellu Ministru, no planu ne’e presiza dezeña oinsá tulun Governu hodi haree bá direitu labarik no foin-sa’e sira.
Programa husi PLAN Internasionál ne’ebé durante ne’e hamutuk ho sosiedade Civíl hala’o iha Timor-Leste liu-liu iha Munisípiu Aileu, Ainaro no Manufahi maka dezenvolvimentu komunidade, foku bá direitu labarik no foin sa’e sira, empoderamentu ekonomia iha baze no protesaun bá labarik.
PLAN Internasionál Timor-Leste maka organizasaun rekoñesida no hetan respeitu ne’ebé servisu hare’e liu bá dezenvolvimentu komunitáriu no direitu labarik iha país, foka bá direitus labarik feto no igualdade jéneru,Plan Internasemionál servisu hamutuk ho labarik sira, joven sira, parseiru sira hodi luta bá mundu ida ne’ebé justu no ema hotu hanesan.