Hasa’e Produsaun, PR Horta Sei kria Fundu ba Kafe

GLENO, www.news-viptv.com – Konsidera kafe nu’udar produtu primadora Timor-Leste hafoin mina no gas, Prezidenti Republika (PR) Jose Ramos Horta planu sei kria fundu kafe atu halo protesaun ba kafé no hasa’e produsaun kafé nian.

Xefi estadu hato’o lia hirak ne’e wainhira halo dialogu komunitariu ho komunidade Munisipiu Ermera, Sabadu (9/7/2022), iha Gleno.

“Bele kria fundu kafé. Primeiru, foti fundu petroliferu tau ba fundu kafé hodi halo investimentu ba aumenta produsaun kafé hodi proteze folin kafé. Tanba folin kafé hanesan mos folin mina, kuandu folin tun fundu kafé halo interven hodi proteze produtor kafé, folin kafé tun ne’e impaktu ba moris, kria fundu kafé sei sai hanesan instrumentu finanseiru ida bele fó protesaun ba produtor kafé,” dehan PR Horta.

PR Horta esklarese, kriasaun fundu kafe ne’e importante tamba kafe laos hanesan ai-fuan seluk no persiza duni tau matan ba nia (kafe) tratamentu.

“Kafé ne la’os hanesan ai-fuan sira seluk maibe presiza tau matan ba tratamentu kafé, governu iha planu no estudu barak ona iha tempu portugues to agora la presiza halo tan estudu ba kafé maibe nafatin mobiliza malu atu kuda kafé iha parte potesial ba kuda kakau, vaunila no maek ho lideransa governu nian no privadu hanesan mos East Coffe Institute no produtor CCT/NCBA, Timor global mobiliza hodi kuda kafé iha timor agrikultura ida ne’ebe mundial,” dehan PR Horta.

Alende nu’udar produtor agrikultor, kafe mos bele sai produtu turismu nian ne’ebe bele atrai turista sira liu hosi hemu kafe tamba nu’udar mos identidade kultura Timoroan sira.

“Timoroan sira tenki hadomi kafe hanesan kultura nasional,” deklara PR Horta.

Iha nia dialogu komunitaria ne’e xefi estadu mos hetan akompanamentu hosi Primeiru Ministru Taur Matan Ruak ho nia membru governu balun. Munisipiu Ermera uniku munisipiu ne’ebe durante ne’e fo taxa bo’ot ba estadu liu hosi exportasaun kafe, maski iha munisipiu balun mos iha produtu kafe hotu.