Governu – UNICEF Diskute Assuntu Dezemvolvimentu Primaria Infansia

DILI, www.news-viptv.com – Governu Timor-Leste liu hosi Vise Primeiru Ministru no Ministro Koordenadór Assuntos Sosiais, Mariano Assanami Sabino no mos Ministra Edukasaun, Dulce Soares hamutuk ajensia Nasoens Unidas ne’ebe hare assuntu labarik, UNICEF, hahu deskuti estratejia sira hosi IX Governu Konstitusional atu alkansa dezenvolvimentu kapital umanu no social liu hosi investimentu dezemvolvimentu primaria infansia (DPI) iha Timor-Leste.

Vise-Primeiru-Ministru no Ministru Koordenador Asuntus Sosiais, Mariano Assanami Sabino hateten katak, labarik sira ne’ebé saudável no edukadu sai hanesan fundasaun ba dezenvolvimentu ekonómiku Timor-Leste nian.

Nia mós subliña importánsia servisu integradu ba labarik sira, no apresia ideia atu estabelese Komisaun Kordenadora Nasional DPI nian ida atu finaliza no implementa Polítika DPI holístiku no multi-setorial.

Entertantu Ministra Edukasaun, Dulce Soares hateten, labarik nia tinan inísiu, sai hanesan fundasaun ba sira-nia moris tomak. Dezenvolvimentu primeira infânsia halibur esperiénsia no esperiénsia multisetorial hodi asegura katak labarik hotu-hotu hetan benefísiu husi polítika, programa no prátika sira ne’ebé proteje, promove no suporta nutrisaun, estimulasaun, aprendizajen, saúde, seguransa no protesaun iha inisiu labarik-nia moris.

“Iha ita nia rain mal-nultrisaun no rais badak ne’e sei sai problema bo’ot, tanba teriotikamente hatete katak, wainhira labarik ida nia dezenvolvimentu sedu, lao la diak no ninia dezenvolvimentu kontinua iha edukasaun no iha area hotu sei afeita teb-tebes tanba nia laiha funsaun ida mak diak,” dehan MInistra Edukasaun ne’e ba jornalista sira, Kinta (17/8/2023), iha Palacio do Governo, Dili.

Hodi deskuti klean liu kona ba DPI, ministra ne’e informa, sei harii steering committee ida neebé kompostu husi ministériu hotu iha área sosiais nian.

“Ohin nee enkontru dahuluk, ba oin oinsá estabelese steering committee ida atu nune’e hotu-hotu bele servisu hodi haree ba assuntu dezenvolvimentu labarik nian hahú husi idade tinan 0 too 7,” informa Ministra Dulce Soares.

Tanba nee, ba oin atu kombate má-nutrisaun presiza ministériu hotu-hotu neebé trata assuntu sosiais tenke servisu hamutuk no halo koordenasaun neebé efetivu nunee bele atinje programa ida nee nia foku.

Reprezentante UNICEF iha Timor-Leste, Bilal Durrani informa katak, labarik sira iha Timor-Leste sofre hela ho moras rais badak, dadus ne’ebe iha hatudu Munisipiu Ermera iha 60 % labarik sira mesa krais badak.

Nia esplika, labarik sira ne’ebe mak moris ho rais badak iha impaktu direitu ba dezenvolvimentu ba iha Timor-Leste no labarik sira nia dezenvolvimentu ba kakutak ne’e ladun dezemvolve ho maximu.

“Tanba ne’e, sira (labarik ho rais badak) ladun hetan oportunidade ba servisu no kontribuisaun ba ekonomia nian iha Timor-Leste sei fraku,” dehan Bilal Durrani.