Governu sei la Tolera Membru PNTL Involve ba Organizasaun Arte Marsiais

DILI, www.news-viptv.com – Governu iha nia estatutu foun Polisia Nasional Timor Leste (PNTL) nian sei hasai membru polisia sira ne’ebe involve an iha grupu arte marsiais ou inklina iha partidu politiku ida.

Ministru Interior, Francisco Guterres iha seremonia entrega atributu organizasaun arte marsiais husi membru Unidade Espesial Polisia no Komando Munisipiu Dili apela ba polisia tenki tau an pozisaun lolos katak nu’udar membru polisia nia labele mete ona ba kualker organizasaun arte marsiais ida, satan partidu politiku.

Membru governu ne’e hateten, katak seremonia hanesan mos sei halo iha komando munisipiu hotu hodi hamos involvimentu membru polisia sira iha organizasaun arte marsiais no arte rituais sira.

Komandante Jeral PNTL, Komisariu Henrique da Costa apela ba membru PNTL hotu katak nu’udar instituisaun seguransa, PNTL sei la tolera ba nia membru sira hodi inklina ba organizasaun arte marsiais no arte rituais sira.

Nune’e mos Ministru Juventude, Desportu, Arte no Kultura, Nelyo Isaac Sarmento husu mos tulun ba membru polisia nasional ne’ebe husik ona organizasaun arte marsiais atu apela mos ba joventude sira atu labele uza arte marsiais hodi halo problema no estraga malu no estraga nasaun.

Komandante PNTL Munisipiu Dili Superintendente Xefi Orlando Gomes apela nafatin ba nia membru hodi kontinua servisu ho professional iha atuasaun.

Nune’e mos Agostu Deker nu’udar membru Parlamentu Nasional iha Komisaun B ne’ebe hare ba asuntu negosiu estranjeiru, defeza no seguransa hateten PNTL maka tenki garante duni paz no estabilidade ba rai ne’e no husu ba nia membru sira atu banati tuir saida maka heroi sira hatudu ona hodi lori nasaun ne’e ba hetan independensia.

Hamutuk iha membru nain 118 hosi EUP no 83 hosi Komando Munisipiu Dili mak entrega sira nia atributu arte marsiais no halo juramentu ho asina deklarasaun sei la involve tan ba sira nia organizasaun refere.