Governu Lansa Prosesu Akreditasaun Jornalista ba Kobertura Vizita Papa Francisco

DILI, www.news-viptv.com – Komisaun Organizadora Vizita Papa Francisco lansa prosesu akreditasaun ba jornalista sira ne’ebe sei halo kobertura ba vizita Papa Francisco iha Dli, Timor-Leste.

Lansamentu ne’e lansa husi Sekretáriu Estadu Komunikasaun Sosiál, Expedito Dias Ximenes, ne’ebé akompaña husi Ministru Administrasaun Estatál, Tomás do Rosário Cabral, no Kardeál Dom Virgílio do Carmo da Silva, Tersa (16/7/2024), iha Sekretariadu Komisaun Organizadora Vizita Papa Francisco.

Jornalista sira wainhira hakarak halo kobertura ba vizita Papa Francisco persiza rejistu formulariu digital ne’ebe liga dereta ho portal governu nian.

Prosesu akreditasaun ne’e esensiál atu garante kobertura jornalístika ida ne’ebé organizada no seguru durante vizita Papa Francisco nian. Sekretáriu Estadu ne’e esplika katak prosedimentu ida-ne’e ho objetivu atu asegura ambiente ida ne’ebé kontroladu no efisiente, no garante seguransa ba partisipante sira hotu no integridade ba informasaun sira ne’ebé divulga.

Jornalistas interesadu tenke kompleta formuláriu espesífiku ida ne’ebé disponivel iha Portál Governu to’o 16 Agostu.

Formuláriu ne’e disponivel iha lian tetum, portugés no inglés no tenke submete kompletu no akompaña ho dokumentus ne’ebé presiza.

Papa Francisco sei vizita Dili, Timor-Leste iha loron 9 to’o 11 fulan Setembru tinan 2024.