banner 1000x250

Governu Kompromitidu Halo Dezenvolvimentu no Hadia Moris Povu

  • Share
Primeiru Ministru Interinu, Mariano Assanami Sabino lori governu nia naran hatoo agradese ba Parlamentu Nasional ne'ebe aprova ona final global proposta OJE 2024. Foto: Media VPM
banner 728x90

DILI, www.news-viptv.com – Nono Governu Konstitusional hafoin aprovasaun final global Orsamentu Jeral Estadu (OJE) tinan 2024 promete ba Parlamentu Nasional (PN) sei exekuta orsamentu ne’ebe aloka hodi halo dezemvolvimentu no hadia moris povu nian.

Membru Paramentu Nasional fo votos a favor ba final global Proposta OJE 2024 ne’ebe aprezenta hosi IX Governu Konstitusional. Foto: Media PN

Primeiru Ministru interinu, Mariano Assanami Sabino iha deklarasaun politika governu nian hateten katak, OJE 2024 kobre ba setor importante sira hotu ne’ebe sai preokupasaun ba ema hotu nian.

banner 1000x250
Primeiru Ministru Interinu, Mariano Assanami Sabino wainhira hatoo deklarasaun governu nian hafoin proposta OJE 2024 hetan aprovasaun final global iha PN. Foto: Media VPM

“Liu hosi OJE maka reafirma ita nia ukun rasik an hodi garante no hadia kondisaun moris povu nian. Ho nune’e iha tempu fiskalizasaun nai deputadu sira bele hare nia impaktu no rezultadu iha terenu. Governu kompromitidu atu fo kontinuidade no dezemvolve setor xavi hirak ne’ebe refleta ona iha OJE hodi responde dadaun no lori haksolok no naroman ba Timoroan hotu,” hateten Assanami, Kuarta (20/12/2023), iha Parlamentu Nasional.

Entertantu iha nia deklarasaun politiku, Sekretariu Jeral Partidu FRETILIN, Mari Alkatiri ne’ebe partisipa iha debate loron ikus hateten, nia lori Bankada FRETILIN vota kontra tamba hare laiha indikador para hatudu uza ba saida.

“Hau lori FRETILIN tomak vota kontra, tamba hau le orsamentu, laiha indikadores para atu hatudu ba ita atu lao ba ne’ebe, indikadores desempenu falta iha orsamentu. Ita tau medida oioin la hatudu dalan,” hateten Alkatiri.

Bankada FRETILIN, esplika Alkatiri, iha situasaun atual, loloos governu tau orsamentu iha investimentu ba diversifikasaun ekonomia.

“Ita tenki hahu investe agora iha diversifikasaun ekonomia, atu harii ekonomia reziliente, ekonomia sirkular, ne’e maka ita tenki halo

Entertantu, Bankada PLP hateten, sira vota kontra tamba OJE 2024 la fo prioridade ba setor xavi sira hanesan setor agrikultura, edukasaun, saude, be’e no saneamentu ne’ebe afeta deretamente ba maioria povu nia moris.

“Laiha vizaun klaru ba diversifikasaun ekonomia, maski OJE ne’e preve programa 183. Besik metade osan aloka deit ba salariu e vensimentu. Governu la aprezenta politika oinsa bele garante sustentabilidade fundu petrolifiu , foti osan liu hosi RSE laiha esplikasaun detaillu sobre interese longo prazu Timor-Leste nian tuir lei fundu petrolifu ordena,” dehan deputadu PLP ne’e

PLP mos konsidera katak programa governu ne’ebe dehan sei reduz pobreza ba 10 % ne’e hanesan retorika deit.

“OJE la reduz pobreza, hamlaha no stunting (raes badak, red), maski iha OJE 2024 pretende atu reduz pobreza ba 10 % bele sai retorika ba iha OJE 2024 tamba la aloka montante signifikativu ba setor sira importante hanesan programa protesaun social nebe hetan deit 0.1%,” nia dehan.

Deputadu Bankada KHUNTO, Antonio Verdial. Foto: Media PN

Oin seluk ho bankada opozisaun KHUNTO, iha nia deklarasaun politika fo votos a favor ba OJE 2024 tamba fiar iha lideransa PM Xanana, governu bele lori dezemvolvimentu ba povu, inklui hadia povu nia moris.

“Ho nunee maka Bankada KHUNTO liu hosi uma demokrasia ida nee’ nafatin oportuna esperansa ba povu Timor-Leste katak ho lideransa PM Xanana hein katak bele lori novidades foun ne’ebe pozitivu ba daruak ba povu TL liu hosi dalan dezemvolvimentu nasional, basa uluk PM Xanana lori novidade libertasaun patria hosi rai seluk,” dehan Vise Prezidenti Bankada KHUNTO, Antonio Verdial.

KHUNTO mos konsidera katak, OJE 2024 sai ran ba estadu no esperansa ba povu, liliu bainhira hahu hosi sesaun diskusaun OJE ba jeneralidade no espesialidade povu Timor-Leste akompana no rona hela nai ulun sira tesi lia iha uma fukun ho objetivu atu dezemvolve nasaun ho diak ba povu TL.

Prezidenti Bankada CNRT, Deputadu Duarte Nunes. Foto: Media PN

Bankada CNRT, nu’udar bankada governu nian fiar katak iha ezekusaun OJE 2024, PM Xanana sei kumpri duni nia programa no sei ezekuta orsamentu tuir lei orsamental no finansas publikas.

“Vota a favor tamba OJE bai-bain, ita hotu hateten katak ne’e ran povu nian. Ami fiar katak OJE ne’ebe aloka ona tuir nia programa governu sei ezekuta iha tinan ida nia laran. Respeita opiniaun opozisaun ne’ebe fiar katak governu ne’ebe lidera hosi PM Xanana sei halo esforsu tomak atu kumpri nia programa nebe trasa ona iha Tinan lima no espesial ba tinan oin,” dehan Deputadu Duarte Nunes nu’udar Prezidenti Bankada CNRT.

Apoia hanesan mos hato’o hosi Bankada PD katak Bankada PD hakarak fo apoiu nafatin inkondisional ba ukun nono governu hodi hametin estabilidade politik no promove desemvolvimentu ida ke ekibiliradu, efektivitativu no sustentavel.

“Apela ba nono governu, membru governu servisu ekipa no halo dezemvolvimentu ba ita nia rai, hakas aas, tane povu nia fiar,” hateten Deputada PD, Sancha Tilman.

PN liu husi sesaun plenária ohin aprova ona iha final global proposta OJE 2024, ho 41 votu a favor, 23 kontra no 0 abstensaun.

Proposta OJE ne’ebe aprovadu ho totál konsolidadu biliaun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.

Valór ida-ne’e inklui dotasaun biliaun US$ 1,83 ba Administrasaun Sentrál no millaun US$ 60 uza ba RAEOA.

Husi montante totál despeza ne’ebé prevee ba Administrasaun Sentrál no RAEOA, millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.

Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6. Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas.

Durante debate OJE iha espesialidade, aprova mós proposta alterasaun balun husi ministeriu sira maibé la afeta ba tetu ne’ebe mak iha.

  • Share

Leave a Reply

Your email address will not be published. Required fields are marked *

error: Content is protected !!