Governu Husu Politiku Sira Labele Politiza Servisu Saude ho Edukasaun

DILI, www.news-viptv.com – Problema saude no edukasaun ne’ebe dadauk ne’e sai isu nasional, Governu husu atu politiku sira labele politiza servisu area rua ne’e.

Vise Primeiru Ministru no Ministru Koordenador Assuntu Sosial, Mariano Assanami Sabino iha nia vizita urjensia iha Hospital Nasional Guido Valadares (HNGV) husu ba partidu politiku sira mos labele intervem servisu governu nian no mos professional sira ne’ebe servisu ba povu.

“Ohin ho koordenasaun ministeriu atu bele tau nafatin servisu hot-hotu ba estadu tenki kumpri totalidade ba estadu. Se deit, bele partidu no organizasaun ne’ebe deit, bainhira asumi ona knar ba estadu ba ema tomak, ne’e ba ema hotu. Partidu labele intervem ba servisu liliu governante no professional sira ne’ebe servi ba povu tomak,” hateten V-PM Assanami ba jornalista sira, Tersa (16/1/2024), iha HNGV, Bidau, Dili.

Governante ne’e mos husu ba professional saude sira atu kontinua kumpri ba nia servisu hodi servi pasiente sira to’o hetan kurativu.

“Ohin hau mai orienta, ita hotu ba estadu, estadu mak alvu prinsipal, tenki servi inan-aman (pasiente, red) sira. Servisu iha ne’e vokasional, laos mai buka servisu. Enfermeira, apoteker, dotor, nee panggilan, katak vokasional,” nia dehan.

Hafoin hetan esplikasaun hosi jerente HNGV sira, kona ba problema stock ai-moruk iha HNGV ba kategoria nessesariu 10-15% persediaan iha hela.

“Gradualmente aimoruk tama hela,” deklara V-PM Assanami hodi fo hanoin nafatin ba Ministeriu Saude atu hare mo’os ai-moruk kategoria vital no essensial, inklui husu ba kompana fornesedor atu kumpri akordu ne’ebe halo ona ho governu no tenki hatama ai-moruk ho regular.

Kona ba mate sira iha mortuariu, V-PM Assanami esplika, ne’e tama ona ba servisu caro funeral nian ne’ebe iha responsabilidade Ministeriu Solidariedade Sosial no Inklusivu ne’ebe atraza iha movimentu transporte nian.

Hafoin hosi HNGV, V-PM Assanami ne’ebe akompana hosi Ministra Saude, Elia Amaral mos halo vizita ba armajem Institutu Nasionál Farmásia no Produtu Médiku (INFPM).