Governu Australia fo US$ 800,000 ba Halo Peskiza Tuberkuloze Iha Timor-Leste

DILI, www.news-viptv.com – Atu apoiu Peskiza Nasionál Prevalénsia Tuberkuloze iha Timor-Leste ne´ebe halao hosi Ministeriu Saude, Governu Australianu fo fundus US$ 800,000 hodi apoia peskiza ne´e. 

Apoia fundus ne’e finansia husi Departamentu Negósiu Estranjeiru no Komérsiu Governu Australia nian nu’udar parte husi kompromisu ho orsamentu US$ 242 millaun husi Australia ba Fundu Global hodi Kombate AIDS, Tuberkuloze no Malária.

Ministériu Saúde nia Programa Nasionál Tuberkuloze iha kolaborasaun ho Menzies School of Health Research (Menzies) ne´e lansa ona Peskiza Nasionál Prevalénsia Tuberkuloze nian, ne´ebe lansa hosi Ministru Saude interinu atual Vise Ministru Saude, Bonifacio Mau-Coli dos Reis, Sexta (9/9/2022) iha JL.Villa, Dili.

“Serimonia ohin nu’udar lansamentu formál, estratéjiku no siéntifiku ba peskiza ne’ebé ofisialmente sei realiza husi ita-nia peskizadór sira husi internasional no nasional ne’ebé lidera husi Dr. Chris nu’udar investigadór prinsipál husi Menzies School of Health Research atu bele buka loloos abut husi moras TB ne’ebé to’o ohin loron ita seidauk bele combate,” dehan Bonifacio Mau-Coli.

Tuberkuloze nu’udar kauza prinsipál ida ba moras no mate iha Timor-Leste, ida ne’ebé nia númeru taxa tuberkuloze aas liu iha mundu. Maske nune’e, númeru loloos husi moras tuberkuloze iha Timor-Leste seidauk hatene ka sei deskoñesidu, tamba ema barak ne’ebé ho moras tuberkuloze mak la hetan diagnoza no tratamentu.

Peskiza Nasionál Prevalénsia Tuberkuloze ne’e ninia objetivu mak atu determina númeru kazu loloos husi moras tuberkuloze iha Timor-Leste. Ida ne’e sei hetan liu husi oferese rastreio tuberkuloze ba ema to’o 20,000 husi fatin 50 ne’ebé selesionadu aleatoriamente (secara acak) iha nasaun laran tomak.

Rastreio ba tuberkuloze inklui kestionáriu badak kona-ba sintoma tuberkuloze nian no raio-X hirus-matan. Sira ne’ebé iha sintoma tuberkuloze nian ka hetan rezultadu raio-X ne’ebé la normál sei hetan teste adisionál ba tuberkuloze nian no sei refere ba sira nia sentru saúde komunitária lokál atu halo investigasaun no tratamentu liu tan.

Dr. Josh Francis, Ko-Lider Projetu Menzies Timor-Leste nian, hateten katak Peskiza Nasionál Prevalénsia Tuberkuloze ne’e hanesan projetu importante ida ne’ebé sei ajuda esforsu nasionál sira atu servisu hodi hapara tuberkuloze iha Timor-Leste.

“Peskiza Nasionál Prevalénsia Tuberkuloze ne’e sei fornese informasaun foun sira ne’ebé importante kona-ba númeru loloos husi epidémiku tuberkuloze nian. Ida ne’e sei ajuda Ministeriu Saúde no ninia parseiru sira atu dezenvolve mellora estratéjia hotu hodi hasoru dezafiu saúde públika signifikante ida ne’e,” dehan Dr. Josh Francis.

Xefe Programa Nasionál Tuberkuloze Timor-Leste nian, Costantino Lopes, hateten Ministeriu Saúde halo kolaborasaun ho Menzies, loke dalan ba sira atu halo peskiza ne’e, ne’ebé sai ona hanesan prioridade ba tempu naruk ba Programa Nasionál Tuberkuloze nian.

“Programa Nasionál Tuberkuloze implementa intervensaun ba tuberkuloze bazeia ba estimasaun kazu tuberkuloze nian ne’ebé nafatin la muda iha tinan 20 ikus ne’e. Peskiza Nasionál Prevalénsia Tuberkuloze nian ne’e sei determina ho loloos númeru kazu husi tuberkuloze nian ne’ebé agora daudaun iha Timor-Leste,” dehan Costantino.

Alende lansa programa peskiza nasional ba Tuberkuloze, lansa mos ekipamentu saude nian hanesan Digital X-ray machines, Sputum collection and cold chain equipment no Survey protocol.

Menzies nu’udar Institutu peskiza médiku prinsipal iha Australia, ne’ebé dedikadu ba hadi’a saúde no moris-di’ak ka bem-estar ba ema Aboriginal no Torres Strait Islanders sira, no lider iha peskiza globál no tropikal kona-ba moras ne’ebé potensialmente ameasa vida, Menzies kontinua tradús peskiza ba parseria no programa sira ne’ebé efetivu iha komunidade sira iha Australia no rejiaun Azia-Pasífiku tomak.