Funsionariu Publiku Grau Kiik Bele Ona Asumi Kargu Dirijenti

DILI, www.news-viptv.com – Governu ba oin bele uza ona funsionariu publiku ho grau kiik hodi bele mos asumi kargu dirijenti ho temporariu.

Dezisaun ida ne’e, Konsellu Ministrus aprova iha sorumutuk ohin Kuarta (10/1/2024), ba projetu Dekretu-Lei, ne’ebé aprezenta husi Ministru Prezidénsia Konsellu Ministrus, Agio Pereira, no husi Prezidente Komisaun Funsaun Públika, Agostinho Letêncio de Deus, kona-ba Rejime Kargus Diresaun no Xefia iha Administrasaun Públika.

Daudaun ne’e, regra sira ne’ebé vigora ezije katak kandidatu ne’ebé atu okupa kargu dirijente enkuadra iha kategoria ruma no grau espesífiku karreira rejime jerál nian, ne’ebé hamosu difikuldade iha prienximentu ba pozisaun sira ne’e, tuir keixa ne’ebé aprezenta beibeik husi liña ministeriál sira.

“Objetivu ba alterasaun lejizlativa ida-ne’e atu halo fleksibilidade ba regra sira-ne’e, hodi permite katak funsionáriu públiku ho grau ki’ik liu mós bele asume kargu dirijente ho temporáriu, naran katak hatudu esperiénsia profisionál iha área korrespondente,” hakerek komunikadu imprensa ne’ebe publika iha portal official governu nian.

Diploma ne’e, hakerek komunikadu ne’e define mós katak substituisaun ba kargu dirijente tenke dezempeña husi funsionáriu públiku, la inklui posibilidade nomeasaun temporáriu husi ajente administrasaun públika.