Eviksaun Tasi Tolu, 1 Junu 2024 Tenki Hamamuk Fatin

DILI, www.news-viptv.com – Sekretaria Estadu Asuntu Toponimia no Organizasaun Urbano (SEATOU) fo tan tempu fulan ida ba komunidade uma 186 iha area protejido Tasi Tolu, Dili hodi hamamuk sira nia uma ne’ebe okupa rai estadu.

Prolongasaun tempu ne’e SEATOU, Germano Dias hato’o iha dialogu ne’ebe governu halo ho komunidade Tasi Tolu sira no sei la tolera wainhira iha fulan Junu, ekipa task force MOSS tun hodi halo eviksaun.

Membru governu ne’e apela ba komunidade Tasi Tolu sira atu labele politiza governu nia programa ba dezenvolvimentu hodi ameasa autoridade sira.

Eviksaun ne’ebe governu halo ba okupante rai estadu ou espasu publiku sira bazeia ba Dekretu Lei no 33/2008 permeiru alterasaun dekretu lei no 3/2024, inklui mos rai protejida no risku ba dezastre, inklui area petejidu Tasi Tolu ne’ebe mos kategoria ba risku dezastre.

Governu iha 9-11 Setembru 2024, sei uza tan area Tasi Tolu hodi sai fatin seremonia ba vizita Amu Papa Francisco ne’ebe halo vizita mai Timor-Leste iha nia viagem ba Azia no Pasifiku.