Ensera Kampana iha Dili, Eleitu Horta Sei Loke Prosesu Krizi 2006

DILI, www.news-viptv.com –  Kandidatu Prezidenti Republika, Jose Ramos Horta ne’ebe kandidata hosi Partidu CNRT no hetan apoiu hosi partidu politiku lubuk ida no movimentu politika barak, Tersa (15/3/2022) ensera ona nia atividade kampana iha TasiTolu, Dili.

Iha komisiu ikus nian ne’e, Ramos Horta promesa sei loke hikas prosesu ba kazu 2005-2006 tamba kazu ne’e nia adversariu sira maka loke hikas hodi lori hanesan materia kampana ba sira nia kandidatu prezidenti republika.

Alende ne’e, nia mos sei halo auditoria ba ro Haksolok, fundus COVID-19 no Sexta Bazika. No mos sei halo investigasaun kona ba relasaun ho Conoco Philips, inklui investigasaun ba prezensa membru polisia iha areia plenaria Parlamentu Nasional nian wainhira halo distituisaun ba estrutura meza presidensia.

Gaspar Afonso, Movimentu Difisiente Vizaun Foun, husu ba difisiense sira atu hamutuk ho Ramos Horta nune’e bele hadia povu hotu nia moris.

Prezidenti Partidu Sosialista de Timor (PST), Avelino Coelho hateten, Povu Timor-Leste sorte hetan lider hanesan Xanana Gusmao ne’ebe kontinua hamrik hodi defende konstitituisaun ne’ebe viola ona hosi ukun nain sira.

Entertantu lider 1975, Jose Luis Guterres esplika, Timor-Leste laos persiza deit xefi estadu ne’ebe povu persiza hodi hare internalmente, maibe internasionalmente, mundu mos persiza nia kapasidade hodi rezolve mos problema internasional, tamba Ramos Horta mos premiadu nobel da paz.

Reporter: Evangelisto Santos Meilana  I  Cameraman: Bendito Soares