Ema nain 147 Afetadu hosi Dezastre, 2 Mate

Dili, www.news-viptv.com – Autoridade Protesaun Sivil (APC) relata ema nain 147 maka afetadu husi dezastre rai halai, anin bo’ot no insendiu ou ahi-han, inklui ema nain 2 relata mate.

Diretor Gabinete Relasaun Externa no Komunikasaun (GREAK-APC), Cesario da Silva Marques esklarese ema nain 147 ne’e husi uma 28 ne’ebe hetan estragus tamba dezastre naturais tolu refere ne’ebe relata iha dadus dezastre periodu 15 to’o 29 Jullu 2024.

“Dadus total neebe mak ami hetan katak komesa iha 15 to’o mai iha 29, familia afetado sira ne’ebe mak ami rejistu hamutuk 147,” informa Cesario Marques ba jornalista sira iha konferensia imprensa, Segunda (29/7/2024), iha Edifisiu APC Kaikoli, Dili.

Husi uma 28 ne’e, APC verifika ona no uma 3 maka la tama kategoria. Uma ne’ebe hetan estragus ne’e maka Bobonaro rai halai 3 no ahi han 2, Ermera (rai halai 8, anin sobu 3), Manatuto (anin sobu 1, ahi han 1), Lautem (anin sobu 1), no RAEOA (anin sobu 2, rai halai 2, ahi han 2).

Ema nain 2 ne’ebe relata mate rejista ida hosi Aldeia Baiana, Suku Larisula PA Baguia, Munisipiu Baucau maka labarik ida tinan 5 ne’ebe monu ba bee naruk akontese iha 12 Jullu. Vitima mate ida seluk husi Munisipiu Ermera, PA Hatolia B, Suku Fatubolu, Aldeia Poerema. Vitima ho naran Januario Martins (46) mate tamba monu bai ha rai naruk.