Ekonomia Azul Sai Prioridade Timor-Leste iha Kooperasaun ho Nova Zelândia

DILI, www.news-viptv.com – Timor-Leste sei sei tau ekonomia azul sai prioridade ba kooperasaun bilateral ho Nova Zelândia.

Iha mapping ne’ebe Embaixadora Timor-Leste ba Nova Zelândia, Idelta Maria Rodrigues aprezenta ba Primeiru-Ministru, Xanana Gusmão, xefi governu husu atu fo atensaun mos ba ekonomia azul ne’ebe sai prioridade ba politika Nono Governu Konstitusional.

“Tanba ne’e maka iha mapping ne’ebe mak hau halo apresenta hela ba relasaun traballu ne’ebe mak lina ministériu sira halo ho Nova Zelândia, aumesmo tempu sua selensia mos fo atensaun kona ba ekonomia azul ne’ebe ke sai prioridade ida ba Nonu Governu Konstitusional,” dehan Embaixadora Idelta Rodrigues ba jornalista sira hafoin hasoru PM Xanana hodi rona orientasaun xefi governu antes aranka ba Nova Zelândia, Tersa (17/9/2024), iha Palacio do Governo, Dili.

Relasiona ho nia kargu nu’udar embaixadora, nia sei mantein no haforsa kooperasaun ne’ebe govenru rua ne’e halo ona durante ne’e.

“Hanesan ita hatene katak ita hotu presija haforsa no hametin ita nia lasus amizade ho nasaun sira espesialmente iha hau nia pozisaun ida ne’e hau presiza reforsa liu tan servisu hotu ne’ebe maka Timor-Leste halo ona ho nasaun Nova Zelândia,” esplika embaixadora ne’e.

Iha nia servisu ne’e, nia sei koordena ho Governu Nova Zelândia kona ba implementasaun atu haruka traballador Timoroan dahuluk ba Nova Zelândia.

“Diskusaun preliminariu ne’ebe mak halo ho SEFOPE sira mak hatene liu dadus hau labele koalia tanba sira mak hatene liu dadus porque akordu ita seidauk halo, sira prepara dunik sistema oinsa mak ita bele tama ba iha akordu entaun SEFOPE agora iha faze ida preparasaun atu sira bele hamutuk ho Governo Nova Zelândia atu prepara esbosu atu nune’e bele hare estrutura akordu ne’ebe mak sei asina vantagem ne’ebe mak ita aprende husi trabalhador sira ne’ebe mak ita hatuka ona ba nasaun sila seluk hanesan esperensia ida ba Timor-Leste,” nia esplika.