Dezastre 8-14 Agostu 2023: APC Relata Ema 3 Mate, Uma 40 Hetan Estragus

Dili, www.news-viptv.com – Sentru Operasaun Autoridade Protesaun Sivil rejistu ema 3 lakon vida no uma 40 hetan estragus tamba dezastre naturais ne’ebe akontese durante period 8-14 Agostu 2023.

Iha Konferensia Imprensa, Diretor Gabinete Relasaun Externa no Komunikasaun APC, Anacleto Caetano esplika dezastre naturais ne’e maka anin sobu uma hamutuk 21, inundasaun (3), rai halai (21) no ahi-han uma (8).

“Akontesimentu ne’e akontese iha Munisipiu (8),  Aileu, Baucau, Bobonaro, Lautem, Manufahi, Liquica, Viqueque, no RAEOA,” dehan Anacleto, Segunda (14/8/2023).

Hosi munisipiu 8 ne’e APC rejista hosi Aileu relata anin sobu estraga uma 3, Ainaro mate 1, Atauro ahi han uma 1, Baucau anin sobu 2, ahi-han uma 1, Bobonaro anin sobu uma 1, ahi-han uma 2, Covalima inundasaun 3, rai halai estraga uma 7, Dili anin sobu uma 2, Lautem anin sobu uma 2, ahi-han uma 1, Liquisa anin sobu uma 1, mate 1, Manufahi, anin sobu uma 1, rai halai estraga uma 5, RAEOA anin sobu uma 2, ahi-han uma 1 no mate 1, Viqueque anin sobu uma 4 no ahi-han uma 2.

Ema nain tolu ne’ebe lakon vida ne’e rejista iha Munisipiu Ainaro maka Luis de Araujo (70) hosi Aldeia Georudu, Suku Soru, Postu Administrativu Ainaro. Ne’ebe mate isin hetan iha to’os laran hafoin lakon dese 5 Agostu no’o depois familia inform aba APC Ainaro hodi hamutuk ho PNTL Esquadra Ainaro hodi buka tuir no hetan iha 7 Agostu 2023.

Mate rua seluk ida rejista iha Tibar, Munisipiu Liquisa ho vitima naran João ne’ebe hetan iha dalan tuan tasi ibun Tibar.

“Iha RAEOA, iha Suku Nifani, Aldeia Bausiu iha 9 Agostu, Mate ida naran Januario Fiu tinan 27, mate tamba taa akar, akar hun hanehan halo ulun rahun, mate fatin,” esplika Anacleto.

Iha konferensia imprensa ne’e, Anacleto mos fo hanoin ba komunidade sira atu kuidadu an no hado’ok an hosi fatin risku hosi dezastre.

“Liu-liu ba sira ne’ebe maka hela iha foho lolon atu kuidadu no atensaun tanba anin bo’ot bele mos sobu uma ou bele halakon ema nia vida no ba parte tasi laran tanba anin bo’ot laos tan deit udan maka bele laloran bo’ot maibe kuando anin bo’ot signikafika laloran bo’ot no mos ba sira ne’ebe viajen husi ilha ba ilha no atensaun nafatin,”apela Diretor GREC APC ne’e.