Desastre Naturais Kosta Sul, APC Rejista Familia 1,361 Afetadu

DILI, www.news-viptv.com – Sekretaria Estadu Protesaun Sivil (SEPS) hamutuk ho Autoridade Protesaun Sivil (APC) rejista hamutuk familia 1,361 ne’ebe afetadu ba desastre naturais ne’ebe akontese iha parte kosta Sul Timor-Leste.

komunikadu imprensa ne’ebe redasaun simu hosi APC informa alende lori sofrimentu ba familia refere, desastre naturais ne’e mos rezulta uma 218 populasaun nian hetan estragus.

“Atu informa det desastre naturais ne’ebe akontese iha kosta sul afeta ba Munisipiu 7, no tuir dadaus ikus 7 Jullu nian, hamutuk iha familia 1,361 maka afetadu ne’ebe mai hosi munisipiu Covalima, Viqueque, Manufahi, Ainaro, Baucau, Manatuto no Lautem,” informa Sekretariu Estadu Protesaun Sivil, Joaquim Gusmão ne’ebe akompana mos Prezidenti Autoridade Protesaun Sivil, Superintedente Polisia, Isamel da Costa Babo ba jornalista sira hafoin hasoru Primeiru Ministru Taur Matan Ruak, Sexta (8/8/2022), iha Palacio do Governo, Dili.

Hosi numeru refere, Covalima rejista familia ka uma kain 250 hetan desastre inundasaun ka be’e sa’e iha Postu Suai Villa, Maukatar no Tilomar.

Iha Viqeuque hamutuk uma kain 554 no afeta ba ema nain 1,656 ne’ebe aontese iha Viqueque Villa, Uato-Lari no Uato-Karbau.

“Manufahi 206, afetadu 1,014. Ainaro 3 maka afetadu, Baucau 11, Manatuto akontese iha Barique ho total familia 327 ho nia ema hamutuk 1,566. Lautem 2 maka afetadu. Anin bo’ot mos akontese sobu uma ida iha Lautem, Baucau, no Viqeuque. Rai halai taka uma ida iha Bobonaro, Manufahi 1, uma 2 iha Viqueque, 1 iha Lautem. Uma estragus 218, 3 iha Kovalima, 9 iha Manufahi, 3 iha Ainaro, 12 iha Baucau, 1 Lautem, 1 iha Bobonaro no 189 iha Viqeuqeu,” dehan Joaquim Gusmão.

Ho desastre naturais ne’e, Governu (Protesaun Sivil) hamutuk ho nia parseiru nasional no internasional responde kedan apoia emerjensia hanesan hahan no depois dadus iha ona sei fo apoia mos sasan konstrusaun uma nian ba vitima afetadu.