CNRT Husu Governu Aselera Lei Cybercrime

DILI, www.news-viptv.com – Bankada Partidu CNRT husu ba governu atu bele servisu hamutuk ho Komisaun A Parlamentu Nasional atu aselera Lei Cybercrime nian iha Timor-Leste.

Lei Cybercrime ne’e levanta husi Deputada Cedilizia Faria dos Santos hodi responde ID Falsu sira iha media social ne’ebe trata lider nasional sira, inklui foin lais ne’e mosu ID Falsu hodi hasai lia fuan mal edukativu ba Primeiru Ministru Xanana Gusmão.

“Ami husu ba governu, liuliu Ministeriu Transporte Komunikasaun bele servisu ho komisaun A atu bele avansa lalais ho meiu ida cybercrime, cyber security para ita bele aprova tia, ba oin ita bele fo ituan ita ninia aktus sira ne’ebé mak ita nia ema sira uza linguagem la edukativu sira,” dehan Deputada Cedilizia Santos, Segunda (24/2/2025), iha Parlamentu Nasional.

Linguazem hirak ne’ebe durante hasai ba lider nasional sira, nia konsidera la edukativu no laiha moral, tamba ne’e nia husu mos ba SECOMS no PSIK atu bele assuntu refere.

“Ha’u nia pergunta mak ne’e,ita nia SEKOMS ninia servisu atu halo saida? Labele kontrola ba buat sira ne’e ga? ita respeita liberdade da imprensa, maibé ho atuasaun sira ne’e ita preokupa tebes, PSIK sebele mós halo ita bo’ot sira nia servisu,” nia hateten.

Lia hanesan mos hato’o husi Deputadu Bankada CNRT seluk, Gabriel Soares hateten persiza duni kontrolu ba media social sira no ID falsu sira ne’ebé mak tolok líder sira.

“Ida ne’e la merese Timor nia oan,” nia deklara.