Bosok Timoroan Servisu iha Portugal, Xefi Estadu Autoriza PCIC-PNTL Prosesu Ajensia

DILI, www.news-viptv.com – Prezidenti Republika, Jose Ramos-Horta husu ba Polísia Sientífika Investigasaun Kriminál (PCIC) ho Polísia Nasionál Timor Leste (PNTL) atu buka tuir ajensia sira ne´ebe fasilita Timoroan sira ba Portugal to´o abandona.

Xefi estadu fo orden ba instituisaun rua ne´e iha sorumutuk Konsellu Superior Defeza no Seguransa (KSDS), ne´ebe halao iha Palásiu Prezidensiál, Sesta (07/10/2022).

“Iha enkontru ida ne’e ko’alia loloos kona-bá ita nia sidadaun sira ne’ebé kuaze ema rihun lima resin oras ne’e iha hela li’ur tanba de’it atu bá servisu, ho liafuan bosok ita nia sidadaun oras nee terus iha neba, entaun sira maka sai vitima ba situasaun ida ne´e,” dehan Xefe Kaza Militár interinu Prezidénsia Repúblika, Majór Francisco da Silva ba jornalista sira.

Hosi Reuniaun KSDS, Xefi Estadu preokupa tebes ho situasaun Timoroan sira iha rai li’ur liu-liu iha Portugál no husu ba governu atu tau atensaun ba situasaun Timoroan sira ne´ebe abandona iha Portugal relasiona ho asuntu ne´e

“Ba iha ita nia sidadaun hotu katak, labele fiar ba ajensia sira ne´ebe bosok atu lori ita nia sidadaun sira hosi Timor ba liur atu hetan diak, maibe sai terus fali,” apela Major Francisco.

Ajénsia sira ne’ebé servisu iha rai laran ne’e, Xefe Estadu konsidera katak sira ne’e bosok servisu hamutuk ho ajénsia ne’ebé trata billeti ne’e halo hosi Timor ba to’o iha li’ur, no kontinuasaun laiha nune’e difikulta Timoroan sira atu fila hikas mai Timor-Leste la di’ak.

“Ita nia sidadaun sira tauk atu fila tanba de’it sira husu osan iha familia ka kolega sira no impresta osan ho montante US$ 2,000 to’o US$ 3,000, ita garantia ida katak ba servisu manan osan diak fila mai atu selu fali,” nia dehan.

Nia mos informa hosi Timoroan sira ne´ebe ajensia bosok, nain 20 fila ona mai Timor-Leste ne´ebe na’in-7 mai hosi Abudabi no na’in-13 mai husi Malázia.