Bankada CNRT Apoia Kriasaun Komisaun Inkeritu Parlamentar ba Governu

DILI, www.news-viptv.com – Bankada CNRT apoia ba rekerementu Bankada FRETILIN ba kriasaun Komisaun Inkeritu Parlamentar hodi halo inkeritu ba servisu governu.

Iha plenaria Parlamentar, Vise Xefi Bankada CNRT, Patrosino Fernandes fo hanoin se bele inkeritu ba servisu governu hahu husi governasaun tinan 2020.

“Bankada (CNRT) atu fo hatene kona ba rekerementu bankada FRETILIN ba kriasaun komisaun inkeritu parlamentar, Bankada CNRT apoia, maibe foku loke hahu husi 2020,” dehan Patrocino Fernandes iha nia deklarasaun iha plenaria Tersa (9/7/2024).

Nia mos aseita ho deklaraun politika Bankada CNRT ba prestasaun IX Governu Konstitusional durante tinan ida maski hetan Kritika barak husi opozisaun, maibe governasaun ne’ebe lidera husi Primeiru-Ministru Xanana Gusmão konsege halo progressu ne’ebe hakerek iha pontu 10 Deklarasaun Politika Bankada CNRT nian.

“Progressu ida ne’ebe ohin haluha temi mos, nono governu konsege detekta katak aviaun ida iha Oekusi, hatama osan ba kaixa estadu US$ 6.000, hasai US$ 150 mil kada fulan, ne’e maka boa governasaun?,” dehan Deputadu CNRT ne’e.

Entertantu Deputadu FRETILIN, Antoninho Bianco konsidera nafatin bankada CNRT ho PD ne’ebe forma IX Governu Konstitusional kontinua laiha sentimentu ba povu nia halerik liliu iha setor edukasaun no saude.