Ba Kalan Sanulu, Papa Francisco Toba Diak iha ospitál

DILI, www.news-viptv.com – Papa Francisco toba di’ak iha ninia kalan sanulu iha ospitál Gemelli, iha Roma, iha ne’ebé nia hetan tratamentu ba pneumonia duplu, tuir Gabinete Imprensa Santa Sé nian.

Papa Francisco iha kalan sanulu ne’ebé deskansa iha ospitál, haktuir hosi komunikadu ne’ebé publika iha loron-segunda dadeer hosi Gabinete Imprensa Santa Sé nian.

“Kalan la’o ho di’ak; Amu-Papa toba no deskansa hela,” sita komunikadu Vatican nian.

Amu-Papa simu hela tratamentu ba pneumonia dobru iha ospitál Gemelli, Roma nian.

Iha Domingu kalan, Gabinete Imprensa Santa Sé nian hatete katak nia kondisaun sei krítiku, maski nia la hetan krize respiratóriu ruma dezde Sábadu dadeer.

Papa Francisco simu ona transfuzaun raan nian hodi hasa’e nia nível hemoglobina nian.

“Trombositopenia ne’e estavel nafatin; maski nune’e, teste raan nian balu hatudu insufisiénsia renál kmaan, ne’ebé maka agora daudaun iha kontrolu,” hatete hosi komunikadu imprensa iha Domingu, hodi hatutan katak “Terapia oksijéniu ho fluxu aas kontinua liuhosi kanula nazál sira.”

Antes ne’e, iha loron-domingu, Amu-Papa tuir misa iha nia apartamentu iha Ospitál Gemelli hamutuk ho médiku no enfermeiru sira ne’ebé tau matan ba nia tratamentu.